Марина Садова, мурызо:
– Пытартыш ийлаште яра жап нерген шонкалаш гына кодеш. «Муза» вокал студийым вуйлатем, вокал дене педагог улам, ятыр жапем лачак тушто эрта. Тыгак музыкым возем, кызыт чонеш логалше у мурым ямдылем. Яра жапыште ешем дене, лишыл еҥем-шамыч дене лияш тыршем. Тыгак Российысе да вес элласе вокалист-педагог-влак дене тунемам. Тидыже у кӱкшытыш шуаш, весе-влакым сайын туныкташ полша. Икманаш, яра жапыште шкем вияҥдаш тыршем. Тыгак жап лийме годым эн йӧратыме олашкем – Санкт Петербургыш – миен толаш тыршем. Тыште чонем кана, тыште вий-куатым, усталык шӱлышым налам.
Михаил Басов (шола гыч икымше), «Каче-влак» группын солистше:
– Яра жапым муаш пеш йӧсӧ. Паша кечылаште тӱҥ пашаште тыршем, каныш кече годым – я концерт, я вес мероприятий-влак. Мероприятий уке гын, ялыш авам деке вашкем. Тушто шуко паша погына, чыла ыштенак шогаш кӱлеш. Чоҥымо-олмыктымо пашаже-можо… Полшаш тыршем. Ярсыме годым ер воктене канаш йӧратем: эҥырым кучен, поплавокым эскераш.
Виктория Мочалова, мурызо:
– Жап лийме годым мый шочмо Пуял ялышкем кудалам. Пӧртыштӧ тӱрлӧ сомылым ыштылам. Сай игече годым тӱнӧ коштам, пӱртӱсыштӧ жапым эртарем, канем. Олаште улмо годым яра жапыште книгам лудам, тыгак «Эрвел марий», «Тулгайык» ансамбльлаш коштам.