Специальный военный операций гыч отпускыш толмышт годым салтак-влак «Сердце матери» организацийын офисышкыже таушташ пураш эреак тыршат. Вет ты волонтёр организаций нунылан гуманитарный полышым поген колтымаште кугу пашам шукта. Ноябрьыште СВО гыч кумшо гана отпускыш толшо Виктор дене эше ик тыгай вашлиймаш эртаралтын ыле.
Байкал вес могыр гыч
Виктор – Забайкальский край гыч, бурят. «Мемнан деч тораште огыл кум элын: Российын, Китайын да Монголийын – чекше верланен. Изинек погранслужбым ужын кушкынам, садлан школышто тунемме годым шкежат военный лияш кумылаҥынам. Индешымше класс гыч кадет корпусышто тунемынам, вара – военный институт. Распределений почеш Камчаткыште, Абхазийыште служитленам», – палдарыш пӧръеҥ.
Марий Элыш кузе логалында манын йодмылан Виктор тыгерак вашештыш:
– Акам Йошкар-Олаште 15 ий наре ила. Тудо тысе качымарийлан марлан лектын – палыме лийынытше Забайкальский крайыште, ончыкылык пелашыже тушто служитлен. Вара акамынак темлымыж почеш ача-авана 2018 ийыште Марий Элыш илаш кусненыт. 2022 ий августышто пенсийыш лектым да мыят Йошкар-Олаш тольым. Пенсийлан документым ямдылаш кӱлеш ыле, садлан жаплан ача-авам дек прописатлалтым. Шкаланем пачерым налшаш, вара чонлан келшыше пашам кычалшаш улам ыле, но шым шукто – мобилизаций тӱҥале, повестке тольо.
Пеленже – гитар
Ончыч Ульяновскышто учебкым эртымеке, полкыштым 2023 ий январьыште Луганск Калык Республикыш колтеныт. Але марте ятыр должностьышто лийынам, кызыт ик войсковой частьыште кадр отделенийыште сомылым шуктем манын палдарыш пӧръеҥ.
«Сердце матери» толкынын волонтёржо-влак дене тудо эше Ульяновскышто улмыж годымак палыме лийын – нуно тушко гуманитарный полышым намиеныт. Тылеч вара эре кылым кучат. Салтак-влак, мо кӱлешым возен, заявкым колтат – вашмут деч посна ик ганат огыт код.
– Шке ешым эше чумырен шуктен омыл, служитлыме годым тидын нерген шонаш жап лийын огыл, кызытат – тыгак. Чонлан неле годым гитарым кидышкем налам. Школышто тунеммем годымак ты семӱзгарым шокташ шке гыч тунемынам. СВО-ш кайыме годымат пеленем гитарым наҥгаенам. А туштыжо ик вер гыч весыш куснаш чӱчкыдын логалеш, тыгай годым, чыла вашке поген, машинаш оптет, тыге гитарем шаланен. Но весым налынам. Жап лийме годым салтак-влак дене пырля погынен муралтена, утларакшым рокым шоктена, – ойла «Ямпил» позывноян салтак.
Ямпил – Викторын кочажын лӱмжӧ. «виян, чыла сеҥен кертше» манын кусаралтеш.
Мӧҥгыжӧ – Марий Элыште
Мӧҥгылан могай кундемым шотледа: Забайкальский крайым але Марий Элым манын йодмылан салтакын вашмутшо тыгай лие:
– Ача-авам кушто илат, тушто мыйын мӧҥгем. Но Забайкальский крайыште родо-тукымем, йолташем-влак илат. Садлан тушко миен толдеат ом чыте. Кажне отпускемлан шочмо кундемышкем миен савырнем.
«Сердце матери» толкынын волонтёржо-влак салтакым ужатымышт годым яра ышт колто – мо кӱлеш манын умылкален, иктым-весым чумырышт, а салтаклан шкаланже пӧлек шотеш шокшо кофто ден балаклавым кучыктышт.
Салтак вуй ӱмбалне дрон-влак эре да шуко чоҥештылыт, садлан антидрон ден дрон-детектор-влак эре кӱлыт манын каласышат, ӱдырамаш-влак ончыкыжо тыгай аппарат-влакым тыманмеш конденат пыштышт.
СВО участник-влаклан теат полшаш шонеда гын, мо кӱлешым «Сердце матери» организацийын офисышкыже намиен кертыда. Адрес: Йошкар-Ола, Эшкинин урем, 10б №-ан пӧрт, 201-ше кабинет.
Авторын фотожо.