Ямалысе Губкинский олаште Марий Эл гыч 20 утла марий еш ила. Нунын кокла гыч иктыже – Лидия ден Геннадий Яндыбаевмыт. Нуно кок эргым ончен куштеныт.
Кажне кеҥежым еш шочмо кундемышкыже толеш. Медведево район Юбилейный посёлкышто Яндыбаевмыт кок пачашан пу пӧртым чоҥеныт. «Лачак тыште ме вийым погена да шочмо кундемын ямжым шижына», – манеш суртоза.
Агрономлан тунемын
Геннадий Ильич Шернур район Мушкыдӱҥ ялыште кандаш икшыван кугу ешыште (кум ӱдыр да вич эрге) шочын. Тудо шымше йоча лийын. Лажъял школышто 10 классым тунем пытарен.
Жапше годым тудо Нартасыште ялозанлык техникумышто агроном специальностьым налын. Тунемаш пурен, армийыш каен. Пӧртылын да тунем пытарен. Мастар еҥым Нартасыштак пашам ышташ коденыт. Агрономлан вер лийын огыл, идалыкат пеле тракторист сомылым шуктен.
Но варажым техникумым Медведево район Ежовышко кусареныт. Садлан тунам самырык еш Медведево районыш илаш каен. Суртоза Юбилейный школышто завхозлан да пел ставкыште физкультурым туныктышылан пашам ышташ тӱҥалын. Тунамак пединститутышто заочно тунемын.
Сандене Г.Яндыбаев ик кечат агрономлан ыштен омыл манеш. Лидия Ивановна пелашыже Марий Турек район Кугу Нольо ял гыч, Ежовысо техникумышто зоотехниклан тунемын. Юбилейный посёлкышто лабораторийыште пашам ыштен, а кызыт эмлымверыште хирургий отделенийыште врачлан полышкала.
Чолга спортсмен
Геннадий Ильич Йӱдвелышке оҥайын логалын. Тудо икымше эргыжым виян спорт секцийыш колтен кертдымыжлан чаманен илен. Тора кундемыште илыше тукым шӱжарже деке 2007 ийыште тидын шотышто умылкалаш кудалын, вет Йӱдвелыште ече дене талын коштмым пален. Каен да тушанак кодын.
Идалык гыч туддеке пелашыже изирак эргыж дене толыныт. Ынде 18 ий Геннадий Ильич ийме шотышто тренерлан пашам ышта. Шкеже ече дене кошташ йӧрата. Эше самырыкше годым Марий Элыште телымсе полиатлон дене спорт мастерыш кандидат лӱмым сулен. Сандене кок эргыжымат ечылан шӱмаҥден. Ынде нуно, кушкын шогалын, ешымат погеныт да Марий Элыш илаш толыныт.
Кугурак эргышт вес кундемыш кайыме жаплан Марпединститутышто тунемын. Тушто ече дене таҥасен. Изиракше школышто тунеммыж годым Губкинский олаште да Ямалыште ече дене таҥасымаште ятыр гана сеҥыше радамыш лектын. Сай спортсмен семын палат. Ынде эргыштын йочашт, Геннадий Ильичын уныкаже, ечыгорнышто шкем устан ончыкта, призовой верлам наледа.
Гармоньчо, мурызо…
Геннадий Ильич изиж годсек музыкым йӧрата. Сандене ялыште илымыж годым тудо гитар, гармонь да клавишан семӱзгарла дене шке семын шокташ тунемын. Кызыт яра жапыштыже марий муро-влакым шона (почеламутшымат, семжымат) да, сценыш лектын, йоҥгалтарашат ок вожыл.
Мо оҥайже: тудым эше 6-шо классыште тунеммыж годым гармоньчо семын ӱдырлан кайыше еш сӱанышке шокташ ӱжын. Шке ялысе рвезыже Шунсола гыч ӱдырым налын. Ондак 24 шагат йӱд деч ончыч каеныт да пелашым эрвелеш конденыт. Тунамат тугак лийын. Тылеч вара ик сӱан почеш весыш коштын. Армийыш ужатыме годымат гармоньым шокташыже логалын.
Тыгай мастарлыкшым варажым Нартасыште пашам ыштымыж годым шуарен. Кугу Нольо клубышто художественный вуйлатышылан пел ставкыште тыршен. Чолга рвезым комсомол организацийын секретарьжыланат шогалтеныт. Концерт, сӱан, ятыр мероприятий…
– Ятыр гармоньым вашталтенам. Ачам ты семӱзгарлан шӱман улмым ужын, Лажъял гыч у гармоньым налын конден ыле. Кызыт визыт уло. Южгунам яра жапыште гармоньым кидыш налам да шокталтен-муралтен колтем. Веселарак лиешат, кӧргӧ чонемжат илышым, пашам вес семынрак шижеш, – манеш тудо.
Мурын шомакше тыглай да ялысе еҥлан моткоч лишыл улыт. Эше школышто тунеммыж годым Г.Яндыбаев Шернур районысо «Призыв» райгазетыш заметке-влакым возкален, школ ден ял илыш нерген каласкален. Такмакше-влакат шочыныт. Но нигушкат луктын огыл.
Икмыняр ий ончыч «Ешем» икымше мурыжо шочын. Кызыт тӱрлӧ темылан вич мурыжо уло. «Ешем», «Кугешнем» да «Мушко ял» мурылажым интернетыштат колышт кертыда. Лишыл жапыште кудымшо мурылан аранжировкым ышташ шона.
Ятыр гана кеҥежымсе Петро кечын Марий Турек кундемын пайрем годым сценыште мурен. Тыгодым пелашыжын ялже нерген шонымо «Ноля ял» мурат йоҥгалтын.
А йӱкшӧ могай яндар?! Интернетыш лукмо мурыжо-влак йымалне ятыр еҥ комментарийыш «сылне йӱкан», «моторын мура, мурыжат мотор», «умбакыжат вес мурет-влак дене куандаре» манын возен. Нине ойла дене келшыдеат ок лий: Геннадий Ильичын йӱкшӧ огеш йыгыжтаре, эре колыштмо гына шуэш.
Шӱм-чонжо дене пӱтынек марий еҥ. Тыгайже-влак шочмо кундем деч сагынен илыше-влак радамыште утларак лектыт докан.
Фотом еш альбом гыч налме.