У саман толмо дене яллаштат илыш вашталтеш. Ондак чыла гаяк еш вольыкым ашнен гын, кызыт шӧр-торыкым, шылым кевытыште налыт. Тугеже ялыште вольыкын кӱлешлыкше йомын? Тидын шотышто лудшына-влак мом шонат?
Людмила Короткова, Йошкар-Ола:
– Мый Йошкар-Олаште илем, а шке шочмо ялем – Кужэҥер район Шӱдымарий. Мыйын шонымаште, ялыште кызыт вольыкым уэш ончаш тӱҥалыныт. Шӱдымарийыштына ушкалым шукын ашнат, вет шӧр-торык кевытлаште шергештын. Мый шкеже налме шӧрым ом йӧрате.
Ирина Васильева, Морко район:
– Ялыште вольыкым ашнымым чарныше-влак вольык ситыдымым шижыт, «пытарыме ок кӱл ыле маныт». Кӱлеш семын шӧр-торыкат, шылат уке. Кевытыште налаш окса кӱлеш, тыгодым налме тыгай пайдалыкше могай, пален огына керт.
Мый шкеже Морко район Изи Маршан ялыште илем. Шӧр-торыклан ушкалым, шыллан сӧснам, сурткайыкым ашнаш тыршена. Ешан, шочшан улат гын, ялыште суртвольык деч посна илаш йӧсӧ.
Дмитрий Бердинов, Йошкар-Ола:
– Ик велым – шуко вольыкшо огешат кӱл, шылым шуко кочкаш сай огыл, маныт. А нимом ышташ гын, сад-пакчам ончаш лиеш.
А вес могырым – кевытыште шукыжо «химий» дене ыштыме кочкышым ужалат. Шӧрыш, сырыш да моло сатуш пальмовый ӱйым ешарат, а тиде тазалыклан эҥгекым ышта. Шылжат антибиотик да моло ешартыш дене ышталтеш. Мыйын шонымаште, кертме семын вольыкым изишыже садак ончыман. Уке гын ялысе калыкшат оласе гаяк йогыш каен.