Тений села-шамычым вияҥдаш 64 миллион теҥгем ойыраш палемдыме. Тӱҥ паша-влакым «Комплексное развитие сельских территорий» кугыжаныш программе почеш шуктат. Тудын дене келшышын, кок тӱрлӧ йыжыҥлан утларак тӱткыш ойыралтеш.
-
Селалаште илыме верым вияҥдымаш. АПК предприятийлаште тыршыше-шамычлан 10 илыме кумдыкым налмаш ты йыжыҥыш пура.
-
Селаласе кумдыкым тӱзатымаш. 2026 ийыште кундемнан ныл районыштыжо тӱшкан пайдаланыме верлам уэмдат. Волжский районышто каныме верым да волгалтарымашым шотыш кондат. Курыкмарий районышто паркым да йоча площадкым тӱзатат. Звениговский ден Медведево районлаште тӱшкан лийме кумдыкым йӧнештарат да йоча городок-влакым келыштарат.
Тыгодым 2025 ийысе паша лектыш денат палдарыде огеш лий. Шушаш ийлан палемдыме кугыжаныш программе ӱмаштат сайын шукталтын. Тудын почеш кундемна мучко индеш проектым илышыш шыҥдарыме. Кужмарийыште, Выльыпсолаште, Нуктыжышто корным да уремысе волгалтарымашым ыштыме. Пиясир (Нурма) селасе администраций зданийым шотыш кондымо. Пурсанур ден Казанский селалаште у корным шарыме. Кугэҥерыште кызытсе илышлан келыштаралтше йоча площадкым чоҥымо. Проектлан кӧра селаласе илыш у шӱлышым налын. Ончыкыжымат ты сомылым вораҥдарымаш шукталташ тӱҥалеш.
Марий Элысе Ялозанлык министерствын пресс-службыжын материалже почеш ямдылыме.