Марий вургем тӱрлӧ сынан улмыж дене илышлан ямым пурта. Ӱдырамаш пайремыш але пазарыш каен гын, тыглай тувырым гына чиен огыл, ӱмбачынже ончылсакышым ӱшталын, тӱрлеман ош шовырым чиен, вуйышко шовычым пидын… Вургемысе тӱр тӱрлӧ осал деч арален.
Кызытсе жапыште чыла марий ӱдырамашын але пӧръеҥын марий тӱран тувыржо укеат. А ожно кажне гаяк ӱдырамаш тӱрлен моштен, ешыжым чиктен.
Тидын нерген учёный-этнолог, В.М.Васильев лӱмеш МарНИИЯЛИ-н кугурак научный пашаеҥже, историй шанче кандидат, Марий Эл Республикысе наукын сулло пашаеҥже Т.Л.Молотова каласкалыш. Ты пашам тудо шокшым кергалтенак шукта: ятыр ий экспедицийыш коштын, фотоматериалым поген, книгам савыктен…
Шарпанан-нашмакан
Морко, Волжский да Звенигово районлаште илыше-влакын марий-влакын вургемышт мо дене ойыртемалтеш? Ты район-влак икте-весышт дене лишнырак улмылан кӧра нуно икгай сынан вургемым чият. Ты кундем-влак Озаҥ лишне верланеныт гынат, сӱан йӱла аралалт кодын. Тусо сӱан радамат, сӱанватын, марлан кайыше ӱдырынат вургемыштат икгайрак улыт. Нине район-влакым вургем шотышто тӱрлӧ тӱшкалан шеледыме годым «Шарпанан-нашмакан комплекс» манын лӱмдымӧ. Нуно вуйчиемышт дене ойыртемалтыт, шарпаным да нашмакым кучылтыт.
Звенигово районысо Какшамарий велне илыше-влакат шарпанан-нашмакан тӱшкашке пурат, но вургемышт шке сынан, тӱрышт, сӧрастарыме насташт чуваш калыкын (вирьял тӱшка) гайрак койыт.
Шарпанан-нашмакан-влак вургемыштым моткоч шуко тӱр дене сӧрастарыме дене ойыртемалтыныт.
Морко районысо марлан кайышаш ӱдыр.
Фото-влакым Т.Молотован «Марийский костюм» альбомжо гыч налме.
УМБАКЫЖЕ 16 сентябрьысе номерыштыже
9-ше лаштыкыште лудса.