Тыге мура «А йӱр йӱреш» мурыштыжо самырык мурызо да автор Руслан Никифоров. «Эр кече вашеш», «Шыже», «Икымше лум дене» да эше лу наре мурыжым тудо эн ончыч шкаланем возенам, манеш. Чон йодмо почеш шуктымо сомылжын саскажым вара соцкылысе лаштыкышкыже вераҥден. Икмынярышт Марий Эл Радиоштат йоҥгат.
«Шкежат кертатыс, возо»
Такшым Никифоровмыт ешыште усталык шӱлышан ятырын улыт. Руслан шкежат да тудын кум изаж ден акаже моторын сӱретлат. Ачашт гармоньым шоктен, но, чаманен каласыман, пӧръеҥ моткоч ондак илыш дене чеверласен. Руслан тунам ныл ияш гына лийын, садлан тыгай тат-влакым ок шарне. Авашт сылнын мурен, тудын шӱжаржат муро-влакым йоҥгалтараш кумылан. Усталык корныш тошкалмыж нерген Руслан тыгерак палдарыш:
– Пошкудо ӱдыр почеламут-влакым возкала ыле. Ялна нерген мыланемат корнылам сералте манын, икана йодынам туддеч: «Нелыже огылыс, йырым-йыр мом ужат, тудым ончен возет да йӧра: курык, ер, ош куэр…» «Шкежат кертатыс, возо», – лийын вашмут. Тыге Морко район шочмо Ердӱр ялем нерген икымше мурем шочын, шымше классыште тунемам ыле. Школышто ик классыште тунемше моло ӱдыр-шамычат почеламутым возеныт, марий йылмым да литературым туныктышына нунын серымыштым тӧрлатылаш мыйым чӱчкыдын йодеш ыле. Тидат сылнымут тӱняш шкешотан ошкыл лийын.
Мутшымат, семжымат
Мутшыге, семжыге Р.Никифоров шке воза. Исключений шотеш «Лиеш гын шулдырем» мурым шотла: почеламутым Кожлаер гыч самодеятельный автор Иван Филатов тудлан возен пуэн. Йорга Каче дене йоҥгалтарыме «Икымше лум дене» мурын кумшо куплетшым Володя Матвеев ешарен. Весын почеламутшылан семым келыштараш толашен ончен, но, шке манмыжла, «паша ок кай». Запись-влакым Руслан пошкудо рвезын аппаратурыж дене шке ышта, аранжировкымат шке ямдылаш тунемын.
Южгунамже ончыч сем шочеш, вара тудлан мутым келыштарем, манеш. Кунам гын мӧҥгешла: икымше куплет ден припев возалтмеке, семым пышта да умбакыже мурын шомакшым сера.
Гармонь ден гитарым
Школ деч вара рвезе Йошкар-Олаш тӱвыра да сымыктыш колледжышкат тунемаш пурен, калык семӱзгар пӧлкаште шинчымашым поген. Но тӱрлӧ амаллан кӧра ик тылзе гыч шуэн каен.
– Баяным шоктымо классыште пырдыжыште гитар кеча ыле. Кидышкем нальым. Кабинетыш курыкмарий рвезе Дмитрий Атласкин пурен шогале. Кум-ныл аккордым ончыктыш, арня жапыште простарак аккорд-влакым шокташ шке гыч тунем шуым.
Гармоньым шокташ 9-ше классыште тунемынам. Пырля тунемше йолташем мемнан дек толын – гармоньым шокта. Келшен, а ялыштына гармонист уке. Нигӧлан нимом ойлыде, шыжым изам дене пошкудо Кӱчыкэҥер ялыш кресачам дек каенна да 12 басан гармоньжым конденна. «Йӱржӧ йӱреш» мурым кум тылзе шокташ тунемынам. Мӧҥгыштӧ ты семӱзгарым шупшкедымем кок арня чытышт, вара изам-шамыч йыгыжгеныт да мыйым пӧрт гыч кочегаркыш поктен колтеныт. Самоучко семын ынде гармонь ден гитарым шоктем, баяным шупшкедем, шӱвыр ден шиялтыш дене семым луктам, – каласкала Руслан Никифоров.
«Шуматкече» дене пырля
Икымше гана сценыш лектын мурымыжым кызытат сайын шарна. Кокласола клубышто 2016 ийыште Шыже балым эртареныт. Клуб вуйлатыше концертыште Русланымат шке мурыжым мураш ӱжын. Моткоч лӱдынам, сценыш шӱкенак луктыныт манын, кызыт шыргыжал шарналта. Тунамак «Шуматкече» ансамбльын солистше-влак тудым шекланеныт да коллективыш мураш ӱжыныт. Рвезе тудо жаплан Кӱчыкэҥер клубышто методистлан пашам ыштен, ансамбль дене пырля выступатлен, шке мурыжо-шамычымат мурен.
– Коллективыште веселарак. Сценыш пырля лектын мураш каньыле. Кызыт шукыж годым Игорь Борисов дене выступатлена. Алексей Алексеев специальный военный операцийыште порысшым шукта, – ойла Руслан.
Чыла – вуйышто
Почеламутшо-влакым посна тетрадьыш ок пого, семымат диктофонеш возен ок пыште. Чыла информаций – вуйышто манын палдарыш автор.
– Утларакше йӧратымаш нерген возем. Иктаж-кӧ мыланем мурым возен пу манын каласа гын, йодмыжым шуктен ом сеҥе, шонем. Весылан огыл, шкаланем ямдылыме икмыняр мурем мучаш марте шуктен ом керт – шке пагытыштым вучен кият. Южо композицийже чылт ямде, студийыш каяш да записьым гына ышташ – жапым муаш ок лий, – ойла Руслан Никифоров.
Яра жапше тудын, чынжымак, шагал. Алина пелашыже да кок икшывышт дене Волжск олаште илат. Вашке кум шочшан ача-ава лийыт.
Шукерте огыл илыме верым вашталтеныт – кугурак пачерыш илаш кусненыт. Руслан Волжскысо ик предприятийыште пашам ышта. Йӧн лектешат, шочмо ялышкыже миен толеш. Тудо поҥгым погаш йӧрата, колым куча. Пӱртӱс лоҥгаште лиймыж годымак у почеламут корныла возалтыт, сем шочеш. Ӱшанена, Руслан Никифоровын усталык аланыште «канышыже» мучашлалтеш да мемнам у мурыжо-влак дене куандара.
Р.Никифоровын альбомжо гыч налме фото-влак.