Кеҥеж пагыт эртымым Тимофей Самокаев тений поснак чот вучен. Вет рвезе 1 сентябрьыште 1 классыш кая. Ты пагытлан тудо чон вургыж ямдылалтын.
«Цифр ден буква-влакым палем, лудын да шотлен моштем. Ынде возаш тунемаш кӱлеш. Вашкерак школыш кошташ тӱҥалнем. Сайын тунемаш тыршем. Спортым, поснак куржталаш йӧратем. А кугу лиймекем, салтак лиям, элым аралаш тӱҥалам», – каласыш рвезе.
Тимофей Килемар район Йӱксар селаште шочын кушкын. Тысе школышкак тунемаш кая. Ешыштыже рвезе – нылымше икшыве. Кок акаже да ик изаже школым тунем пытареныт.
Тимофейын аваже, Ирина Самокаева, шке шочшыжо-влакым школыш тылеч ончычат ужатен. Туге гынат тенийысе пайрем тудланат моткоч вучымо да шерге. Изи падыраш эргыж верч аван чонжо нигӧ деч чот куана да тунамак вургыжеш. Ончылно – шинчымаш кугорно, ятыр у кӱкшыт, у сеҥымаш-влак.
Тек школ пагыт, тунемме жап кажнылан пиалан да волгыдо лийыт! Пайрем дене!
Алёна Яковлева.