«Кугарня» газетын черетан мыскара-конкурсшо шошо вӱд гаяк гӱжлен, писын эртен кайыш. 1 апрельыште Йошкар-Оласе Сеҥымашын ХХХ идалыкше лӱмеш тӱвыра полатыште «Воштылаш, товатат, сулык огыл!» конкурсна лийын. Тушко районлаште ойырымо турым эртарыме деч вара эн ойыртемалтше, оҥай мыскараче-влакым чумыренна.
Икымше верым Волжский районысо Чодыраял Корамас гыч «Чоткар тукым» коллектив (вуйлатышыже Зинаида Петрова) «Марлан кайынем» сценкыж дене нале. Кокымшо вер дене Морко район гыч Лариса Семёнова ден Наталья Алексеева «Ынде ман» (Морко театрым вуйлатыше Анна Якушева ямдылен) сценкышт дене палемдалтыныт. Кумшо верым кок артист: Марий самырык театрын актёржо Михаил Александров («Оньыкува») да М.Шкетан лӱмеш Марий театрын актрисыже, Марий Элын сулло артисткыже Марина Почтенева («Тӱшка паша») — мыскара монологышт дене сеҥеныт. «Мыскараче мурызо» номинацийыште Оршанке район Чирки гыч «Ош куэ» да МарГУ пеленысе «Марий мурсем» ансамбль-влак палемдалтыныт. Кумылаҥдыше призым Волжский район Сотнур гыч Никас ден Илья Игнашевмытлан «Ну, мо вара?» койдарчык мурыштлан пуэныт. Нунылан пӧлекым, йоча пӱкен-влакым, Йошкар-Оласе Ломоносов лӱмеш урем, 2-шо номеран пӧртыштӧ верланыше «Витекс» фирме (вуйлатышыже А.Ведушев) ямдылен.
Калыкын тӱшкан воштыл, совым рӱж кырымыже пашана арам ышталтын огыл манмым, товатат, ончыктыш. Вет кугу сценышке «шӱмлымӧ» мыскараче-влакым лукташ манын тыршенна. Лач ялысе артистна-влак дене кӱчык жапыште пашам ыштен, нунын мастарлыкыштым ончышо-влаклан почын пуэн кертынна, шонем. А тидым ышташ мыланна районлашке кудалыштмына годым Марий Элын сулло артистше, режиссёр Валерий Помбеевич Григорьев полшен.
Конкурс годым икте сеҥыме, весе сеҥалтме кумылым шижытеш. Садлан вет тудо конкурс! 25 ий жапыште мыняр мыскарачылан корным почынна, нуно лӱмлӧ еҥ лийыныт. Тидымат мондыман огыл!
Ӱчашымаш, таҥасымаш, икте-весе деч чолгарак лиймаш, койыш-шоктышым ончыктен моштымаш кажне участникын чонжо гыч лектын. Садлан «Кугарня» редакций дене пырля лиймылан чылаштлан кугу таум каласена. А ме шкенан велым тыланда кугу сценыш лекташ йӧным ыштена, молылан мастарлыкда дене палдарена да кеч-могай пашадам виктараш полшаш ямде улына.
Кугу таум вӱдышӧ-влаклан, Самырык театрын артистше-влак Галина Соловьёва ден Артем Куклинлан, каласена. Нунат икымше гана мемнан конкурсыштына усталыкыштым ончыктеныт. Тыгак «Кугарня» газетын коллектившат мыскара шӱлышыжым шылтен огыл, «Омо» сценке дене пайрем касым почын.
А кӧ шке мыскараж дене эше калык ончык лектын огыл гын, мыланна шижтарыза. Ямде сценкыда уло гын, ӱжса, ме ончалаш миена. Койдарчык, пантомиме, монолог, сценке, икманаш, мыскаран тӱрлӧ шӧрынжӧ илыш дене кылдалтын. Тидлан пӱсӧ йылме дене пӱшкыл пуымо, яндарын мутланыме да ончаш толшылан утен каен воштылаш йӧршӧ «сату» гына лийшаш.
Лийза поро, весела. Налза, лудса «Кугарням».
