«Кугарня» газет» ГУКП «Воштылаш, товатат, сулык огыл» мыскара онлайн конкурсыш ушнаш ӱжеш.
Тудо 8 февраль гыч 28 март марте эрта. Тушко Марий Эл да марий-влак илыме чыла кундемысе тӱвыра пӧрт (клуб) ден школла гыч коллектив-влак, самодеятельный артист, тыгак посна еҥ-шамычат ушнен кертыт. Видеопаша-влакым «Кугарня» газетын ВКонтакте, Одноклассники, Инстаграмм соцкылласе группылаштыже ончаш да аклаш лиеш. Келшыше номерлан лайкым шындыза. Сеҥыше-влаклан вер ончышо-влакын йӱклымышт да жюрин аклымыже почеш пуалтеш.
Видео 8 минут деч кужурак лийшаш огыл, тудым горизонтально сниматлыман. Модшо-влак лишнырак лийшаш улыт, чурийышт койжо. Ик сценкыш 4 еҥ деч шукырак персонажым пуртыман огыл. Видеом войзымо годым камера ынже чытырналт. Ойлышо-влакын йӱкышт раш шоктышаш.
Конкурсыш икмыняр номинаций дене видеопашам темлыман:
— «Оҥай сценке»
— «Монолог, анекдот»
— Мыскара муро
— Пантомиме
Ийгот шот дене аклалтеш:
1) йоча-влак (10-16 ий)
2) кугыеҥ-шамыч (17 ий деч кугурак-влак)
Сеҥышым палемдыме годым шотыш налалтеш:
— произведенийын содержанийже;
— моторын да арун марла кутырымаш;
— актёр мастарлык, эмоций;
— костюм.
Сеҥыше-влакым чапле пӧлек вуча. Кажне участниклан – конкурсыш ушнымо нерген сертификат.
Паша-влакым kugarnya2015@mail.ru адресыш колтыман.