Российысе «Смена» йоча рӱдерыште «Ворошиловский стрелок» йоча да самырык-влаклан Всероссийский фестиваль лийын. Тудо тунемше-шамычын военно-прикладной да спорт моштымашыштым пеҥгыдемдаш полшаш виктаралтын.
Тушко элнан 60 регионжо гыч 14-15 ияш 120 наре участник ушнен. Марий Элын чапшым фестивальыште В.С.Архипов лӱмеш Семёновка селасе школын тунемшыже-влак Виктория Сусликова ден Глеб Станков араленыт.
Ӱдыр-рвезе-влак спорт да усталык дисциплиныште, «Юный Ворошиловский стрелок» знак верч таҥасымаште ӱчашеныт. Тыгак туризмын, самбо кучедалмашын да строевой подготовкын тӱҥжым шымленыт. Тыгак «Зарница» модмашыште, ГТО-гонкышто участвоватленыт, СВО-н участникше-шамыч дене вашлийыныт да моло мероприятийыште жапым пайдалын эртареныт. Виктория ден Глеб 4-ше отрядын командыштыже таҥасеныт. Ты отряд икымше вер дене палемдалтын да куснылшо кубокым налын. А землякна-влакын отрядышт «Смена» лагерьыште моло-влак коклаштат икымше лийын.
Марий Элысе Образований министерствын сайтше гыч налме фото-влак.