Волгыдо Кугече пайрем!

Кугече пайремын шке йӱлаже-влак улыт. Те нуным шуктеда мо? Шке еш йӱлада-влак улыт гын, палдарыза.

 

Ольга Яковлева, Йошкар-Ола:

– Кугече – мыланна эн вучымо шошо пайрем. Тиде кечылан моло семынак муным чиялтена, моторын сӧрастарена. Мелнам кӱэштына, куличым ямдылена, моло тӱрлӧ сийым ӱстелтӧрыш погена, Юмылан пелештена. А вара унала коштына, вашла муным пӧлеклена. Кугече деч ончыч тыгак сурт гыч осалым поктен луктына, нулго уам, пызле укшым омса ӱмбак пижыктена. Но тиде пайремын ик эн сылне йӱлаже – эрдене кече лекмым ончымаш. Кугече годым эр кече модын-чӱчкен нӧлтеш. Тидыже мылам эн ӧрыктарышыла чучеш, чонышко юзо шӱлышым пурта.


Юрий Морозов, Кужэҥер район:

– Кугече пайрем йоча годсо пагытым ушештара. Шарнем, Кугечылан эре мончашке пурена ыле. Тыгак тиде пайремлан ялысе пистерыште лӱҥгалтышым ыштеныт, тушто лӱҥгалтенна. Кандыра дене ямдылыме лӱҥгалтышым мӧҥгыштат ыштена ыле. Кызытат южгунам ыштена. Муным чиялтена. Ожно подкогыльым ыштеныт, мелнам кӱэштыныт, пурам шолтеныт. Нине йӱла-влакым кызытсе пагытыште меат шуктена.

 


Евгения Синичкина, Марий Турек район:

– Шуматкечын мончаш пурен, коҥгаш олтена, когыльым ыштена. Ончыч когыльо падыштыме комбо шыл гыч лийын, кызыт гын ме индюк фарш дене ямдылена. Тыгак муным чиялтена. Эрдене эр кынелын, у вургемым чиен, Юмылан пелештена. Ожно тиде пайремлан марий-влак ӱмбал ден торыкым лугеныт, меат тыге ыштена. Руш калык кочкыш-влакымат («пасхым», куличым) налына. Кугечылан кеч ик муным кочкаш кӱлеш маныт. Тыгак кум суртышто кум муным вашталтыман: шкендыным пыштет, еҥыным налат. Ожно, рат дене шогалын, курык гыч муным пӧрдыктен колтен модыныт. Кӧн муныжо торашкырак кая, тудын ӱмыржӧ кужу лиеш манын ойленыт. Меат модына, вара ваш-ваш муным перкалена. Кӧн муныжо огеш шалане, тудо сеҥыше лиеш. Кугечым изижге-кугужге вучат. Мемнан шуктымо йӱланам йочана-влакат ужыт, тунемыт да шукташ тӱҥалыт манын ӱшанена.


 

Степан Бекешев, Морко район:

– Ешыштына Кугече кечын сортам чӱктымӧ да кумалме деч ончыч иктат ӱстелтӧрыш ок шич, кочкышым ок чесле. Юмылан пелештыме деч вара веле уремыште «нерым ончыкташ» тыршена. Тунам чиялтыме муно дене йолташ да пошкудо-влакым сийлаш лиеш. Тыгак ешыштына чылан пашат: ты кечын нигӧ дене вурседалаш ок йӧрӧ.