У тунемме ий! Шинчымаш кугорнышто эше ик у ошкыл! Йолташ-влак, тиде сылне пайрем дене чыладам шокшын саламлена! А могай кумыл дене тудым лудшына-влак вашлийыт?
Дмитрий ВЕДЕНЬКИН, Шернур район:
– Мый Шернур посёлкысо А.М.Яналов лӱмеш 1-ше номеран школышто 10-шо классыште шинчымашым погем. Чылаже латиктын улына. Кумыл шулдыраҥше. Тений школнам капитально олмыктеныт. Уэмдыме сынан школыш толын пураш моткоч куанле. У тунемме ийым волгыдо кумыл дене вашлийым. У вий да у шӱлыш дене тыршаш тӱҥалам.
Анастасия ИВАНОВА, Йошкар-Ола:
– Мый латкандаш йолташем дене пырля биологий да химий классыште тунемам. 11-ше класс – школ дене чеверласыме пагыт. Садлан шӱлыкшат изиш уло. Вет кызытсе еш деч ойырлымо ок шу. Туге гынат кумылем волташ ынем пу. Ончыкылык у сеҥымаш верч тыршыман. ЕГЭ-м сайын кучыман да чонлан келшыше специальностьым налме нерген шоныман. Вузыш тунемаш пураш ямдылалтман. Чылалан тазалыкым, келге шинчымашым тыланем!
Александр КОНОВАЛОВ, Шернур район:
– Йошкар-Оласе Палантай лӱмеш тӱвыра да сымыктыш колледжын «Национальные инструменты России» отделенийыштыже тунемам. 2-шо курсыш вончышо йолташем-влак дене уэш вашлийна. Могай куан! У тунемме ий дене чылам шокшын саламлем!
Анастасия ОРЕХОВА, Советский район:
– 8-ше классыш вончымо кече моткоч поро шарнымашым кода. 1 сентябрьыште Ӱшнур школ тиде кундемыште тӱрлӧ вере илыше йоча-влакым шке йырже чумырыш. Уэш парт коклаш шинчына. Келге шинчымаш эре кӱлеш. Таклан огыл калыкыште ойлат: «Тунеммаште – вий». Школышто шун дене ыштыме паша кружокым да гитар дене шокташ тунемме занятийым чон вургыж вучем. Путырак келша. кок вережат кошташ тӱҥалам.
Елена СЕМЁНОВА, Морко посёлко:
– 1 сентябрьыште Палантай лӱмеш тӱвыра да сымыктыш колледжын калыкле сымыктыш гимназийын (ончычсо калыкле президент школ) тунемше-влакым Марий Эл Республикын тӱвыра, печать да калык-влакын пашашт шотышто министр Константин Иванов саламлен. Моткоч куаненна. Ынде 8-ше классыш вонченам. У да неле предмет-влак лектыныт. Туге гынат кумыл сай. Ача-авамлан Марий Элыште ик эн чапан школыш шинчымашым погаш колтымыштлан кугу таум ойлем. Йолташем-влак, у тунемме ий дене!
Зоя ТИМОФЕЕВА ямдылен.