Спецопераций кайыме кундемыште улшо салтакна-влаклан калык тӱрлӧ семын полшаш тырша. Мутлан, Волгатехыште волонтёр-влак гуманитарный полышым чӱчкыдын поген колтат. Ты сомылым Анна Артамонова вӱда. Ик кечын тудын дене вашлийынам да поро пашашт нерген умылкаленам.
Анна Владимировна – гуманитарный образований факультетын деканже. Тудо йочапӧртыштӧ илыше икшыве-влаклан, суртдымо янлык-шамычлан ятыр ий полышым пога. СВО тӱҥалмекат ӧрдыжтӧ кодын огыл.
– Элнан неле ситуацийыш логалмекше, эн ончыч Гуманитарный образований факультетыште студент-влаклан Россий нерген просветительский курсым эртаренам. Вара гуманитарный полышым пуышо тӱшка-влак дене кылым ыштенам. Поро пашам шукташ еҥ-влакын кумылан улмыштым шижмеке, Волгатехын ректоржо деке йодмаш дене лектынам. Тыге 2022 ий 27 сентябрьыште приказ ышталтын да ВКонтакте соцкылыште тӱшка «шочын». Тиде жапыштак «Орда» телеграм-канал деке лектынна, сомылым пырля шуяш тӱҥалынна, – ойла А.Артамонова.
Волгатехыште гуманитарный полышым погымым кок направлений дене вӱдат: 3D принтерыште пластик гыч кӱлеш ӱзгарым печатлат да вургем дене средствым погат.
– Ме утларак технический полышым пуаш тыршена. Тидлан аккумуляторым, пауэр-банкым, генераторым наледена. Тыгак университетын пашаеҥже, туныктышо-шамыч носким пидыт, студент-влак серышым возат. Кварталлан ик гана колледж-влак мемнан деке ушнат.
Ме шке гуманитарный полышнам передовойышто улшо салтак-влаклан гына колтена, сандене учётым чот вӱдена, списке почеш кӱлеш арверым гына налына.
Мутлан, вашке локтылалтше кочкышым, янда ӱзгарым, шинчалтыме пакчасаскам, шере кочкышым огына нал. Иктаж-кӧ спискылан келшыдыме кочкышым, арверым конда гын, тудым вес организацийыш намиен пуаш темлена.
Гуманитарный полышым погымо годым ме ондак качествылан кугу тӱткышым ойырена, вет армийлан эн сай вургем, эн сай арвер кӱлеш, – палдара Анна Владимировна.
Погымо арверым сортироватлаш студент-влакат полшат. Вара тудым Моско олаш колтат, а тушеч салтак-влаклан наҥгаят.
Волгатехын волонтёржо-влак кум ийыште 1,5 тонн утла гуманитарный полышым колтеныт. Кызыт 34-ше партийым колташ ямдылалтыт.
Салтак-влаклан шокшо вургем, носки, дождевик, резине кем, термовургем кӱлыт. Кӧн полшаш кумылжо уло, тудо «Орда» телеграм-каналыш але Анна Владимировна деке лектын кертеш. Тыгак Волгатехын ВКонтакте тӱшкаштыже гуманитарный полышым погымо нерген увер чӱчкыдын вераҥдалтеш.