Воктене умылышо йолташ лийже

Изирак кевыт омсаште возымо: «Пырысиге-влак ужалалтыт». Тидым ужын, тушко ик рвезе пура да йодеш: «Пырысиге-влак мош шогат?» «30-50 теҥге», – вашешта кевытче. Рвезе кӱсеным пургедеш, но 20 теҥгем веле муэш. «Мыланем кеч пел шинча дене ончалаш пуыза», – сӧрвала рвезе. Кевытче шыргыжалеш да кугу коробка гыч пырысиге-влакым луктеш. Нуныжо, эрыкыш лекмеке, тӱрлӧ могырыш кудалыт. Икте гына чылашт деч почеш кодын, тудо йолжым шӱдырен. Рвезе тиде пырысигым моткоч чаманен, да лач тудым налаш шонен пышта. «Тиде пырысигын йолжо шочынак сусыр, тудым тӧрлаташ огеш лий, эрелан тыге кодеш. Молан тыланет тудо кӱлеш? Вет тиде изи мундыра нигунам ны кудалышташ, ны тӧрштылаш, ны модаш огеш тӱҥал», – умылтара кевытче. Тунам рвезе шола йолысо йолашыжым нӧлталеш. Кевытче ужеш: рвезын йолжо чот кадырген да кӱртньӧ оҥго-влак дене гына кучалтын. «Мыят нигунам куржталын да тӧрштылын ом керт. Тиде пырыслан умылышо, тудлан полшышо йолташ кӱлеш», – чытырыше йӱк дене манеш рвезе.

Кевытчын кумылжо тодылалтеш, шинчавӱдшат лектеш. Изиш шып шогымеке манеш: «Эргым, мый чыла пырысигын тыйын гай поро шӱм-чонан озаже лийже манын кумалаш тӱҥалам».

Илышыште тыгак: кӧ улат тӱҥ огыл, тӱҥжӧ – воктенет тыйым аклыше, умылышо, йӧратыше, полыш кидым шуялташ ямде улшо еҥ лийже.