Йошкар-Оласе пашам ситарыме рÿдерыште тачысе кечылан 2 тÿжем 676 вакансий уло. Врач, медсестра, менеджер, инженер, водитель-влак огыт сите, эсогыл полиций пашаеҥ-влакат кÿлыт, поснак – участковый-влак. Ты рÿдер вуйлатышын алмаштышыже Любовь Климентьевна Боякова дене рÿдерын пашаже, вакансий шотышто мутланышна.
Пашам ситарыме рÿдер тÿрлö категориян еҥ-влак дене пашам ышта. Тышке самырык, кугыеҥ, йоча, пенсийышке шушо-влак, тыгак начар тазалыкан еҥ-влак келшыше пашам кычалын толыт. Начар тазалыкан, инвалидностьым налше еҥ-влакым самырык ийготанлан 43 ий марте шотлат. Тыгай-влаклан 200 вакансий лиеда. Нунылан кугу организацийлаште жаплан пуымо паша-влак улыт. Тидын шотышто кажне тылзын пашам пуышо уверым колтен шогат. Каласен кодымо 200 вакансий коклаште ондак вахтёр, пашазе специальность-влак ятыр лийыныт гын, кызыт инженер, архитектор, бухгалтер-влакат кӱлыт. Жаплан темлыме пашашке начар тазалыкан еҥ кая гын, тудлан эше 2700 окса тӱлалтеш.
Самырык-влаклан тыгак ятыр мероприятий, ярмиҥга эртаралтыт. Рӱдерын пашаеҥже-влак вузлашке, техникумлашке коштыт. Ынде ятыр ий февраль гыч май марте рÿдерын пашаеҥже-влак работодатель дене пырля вузысо тÿрлö факультетла дене посна вашлиймаш-влакым эртарат. Тыгайже ÿмаште 11 лийын, тений южо факультетым пырля ушымылан кöра – 8 гына. А шошым да шыжым паша вакансий ярмиҥга-влак лиедат.
«Ярмиҥгам Йошкар-Олаште самырык-влакын полатыштышт эртарена. Тений тудо 23 мартыште лие. Тушко пашам темлыше 50 наре еҥ погынен ыле. Чыла тидыже самырык-влак кушко пашаш каяш шонымашыштым ончылгоч палышт манын ышталтеш. Тиддеч вара вузым тунемын пытарыше, дипломым налше-влак мемнан деке шагалынрак толыт. Таче рÿдерыш йодын толшо ик выпускникат уке. Самырык-влаклан инженер вакансий темлалтеш. Кызыт тӱрлö инженер-влак поснак кӱлыт. Шуко ужалыме вер уло, сандене продавец-влак эреак кӱлыт. Чумыр вакансийым ончалаш гын, врач-влак кокла гыч акушер-гинеколог (10 еҥ), реаниматолог (7 еҥ), УЗИ врач (5 еҥ), неотложный медполышым пуымо станцийын врачше (15 еҥ) огыт сите. Водительлан гына 83 вер уло. Шофёр-влак пеш чот кӱлыт, но пашам темлыше-влак чыла категорияным, сайын пашам ыштышым, аракам йӱыдымым кычалыт. Унагудышто пашам ыштыше еҥ-влакат кӱлыт (12 вер). А грузчик-влак шотышто кызыт 35 еҥлан гына вер уло. Инженер-влак кокла гыч инженер-программист, инженер-технолог, инженер-конструктор специальностьян еҥ-влакым вучат. Кызыт дворник-влак шагалрак кӱлыт. Менеджерлан 64 вакансий уло. Тушеч 39 еҥ мемнан дене учетышто шога. Кухонный пашаеҥ-влаклан 37 вер темлалтеш. Полицейский-влакым пашашке вучат, но тушко пураш нелырак, молан манаш гын образований деч посна судимость лийшаш огыл», — ойла Любовь Климентьевна Боякова.
Рӱдерын пашаеҥже-влак йоча-влак денат пашам ыштат, школлашкат коштыт. Кеҥеж каныш годым икшыве-влак пашам кычалыт. Кажне кечын манме гай 5-10 йоча толеш. Тачысе кечын Йошкар-Олаште 14 ий гыч 18 ияш марте 245 тунемше пашам ышта.
«Йоча-влак шотышто рӱдерыште посна программе уло, тудын почеш работодатель дене ойпидышым ыштена. Паша кодекс дене келшышын, договор почеш йоча-влакым пашашке налыт. Нунылан ик тылзылан материальный полыш семын 1500 теҥге оксам тӱлена. Тыгак общественный паша шотышто программе уло. Тушко квалификаций деч посна, шагал тӱлымö, жаплан гына пуымо паша-влак пурат. Тыгай пашашке пурымылан 2250 тенге материальный полыш тӱлалтеш. Йоча-влак кызыт курьерлан да бухгалтерын, документвоведын, менеджерын полышкалышыштлан ыштат. Йошкар-Оласе поликлиниклаште отпуск жапыште регистратурышто полышкалат. Кызыт тушто 5 тунемше пашам ышта. Лагерьлашке кӱмыж-совлам мушкаш кайыше икшыве-влакат улыт. Мо гынат йоча-влак кугыеҥ семын пашам кечыгут огыт ыште», — ойла Л.Боякова.
Тиддеч посна рӱдер пенсийыш шудымо ийготан еҥ-влак денат пашам ышта. Нуным тӱрлö специальностьлан тунемаш колтат. Йоча дене кум ий марте шинчыше ава-влак рӱдер кӱшеш ешартыш специальностьым яра налын кертыт.
Икманаш, самырык-влак паша верым муын огыт керт гын, шуко шоныде, ты рӱдерышке (Йошкар-Ола, О.Тихомирова лӱмеш урем, 59) миен кертыт. Вет тыште келшыше вакансийым муын, куштылгын пашашке пураш лиеш.