Виян койыш-шоктышан героине-влакым модеш

 

 

Марий самырык театрын ик уста актрисыже Надежда Ибашеван (Шарабуева) мастарлыкше ешаралт толмым ынде коло ий наре эскерем. Тудо йӧратыме сомылжым 2001 ий годсек шукта. Ты жапыште Надежда чынжымак шкем оҥайын да ойыртемалтшын ончыктен, 50 утла образым чоҥен. Тылеч посна тудо костюмерлан пашам ышта.

Ава гармоньым шокта

Надежда – Шернур район Шӱдымарий ялыште илыше Александр Иванович ден Зоя Николаевнан ныл шочшо кокла гыч эн кугурак икшывышт. Ольга шӱжарже – Йошкар-Оласе 40-ше №-ан йочасадыште (тудо ондакысе президент школ-интернатын зданиешыже верланен) методист. Иван шольыжо Йошкар-Оласе шыл комбинатыште пашам ышта. Софья шӱжарже Озаҥысе йоча да сымыктыш школышто домр да гитар дене шокташ туныкта. Ондак ачашт колхозышто водительлан пашам ыштен, кызыт школысо котельныйыште – оператор. Авашт зоотехниклан, комплекс вуйлатышылан тыршен, варажым школышко кӱварым мушкаш каен. Пайрем годым Зоя Николаевна гармонь ден баяным кидышкыже налын шокта. Ӱдыр-влакат семӱзгар-влаклан шӱмаҥыныт. Ольга ден Софья фортепиано ден гитар дене шоктен моштат, Надеждат ондак гитарым шокташ йӧратен.

Оҥай да неле роль

Мыланем ты актрисе Зинаида Долгован «Шудо шешке» спектакльыштыже ушеш кодын. Тушто тудо Марлюкын, варажым Тачанан образыштым почын пуэн. Тиде – комедий, тыгай жанрыште модаш кажне актёр келшен огеш тол. А Надеждан келыштарыме роль-влак путырак шотлан толыныт. Шинчаончылнем спектакльысе героине-влак тачат койыт: нуно, монча гыч толын, шӱргышкышт шуным йыген шинчен, тӱрлӧ нерген кутыркалат…

Надеждалан йомак персонаж-влакым модаш путырак келша. «Чудесное превращение Бабы-Яги» (И.Чубарова, И.Егорова) йомакыште да «Гадкий утёнок» (Г.Х.Андерсен) постановкышто тӱҥ роль-влакым келыштарен. Пытартыш йомакшым тӱрлӧ олаласе фестивальлаште ончыктеныт, пашажлан шуко таумутым каласеныт.

«Йочам от ондале, тудын кӧргӧ чонжо вигак коеш. Икшыве-влаклан модын моштыман. Школ программе почеш ятыр постановкым ямдылена. Шкемым тӱрлӧ образыште терген ончаш лиеш: таче положительный рольышто улат гын, эрла – отрицательныйыште», – манеш Н.Ибашева.

«А могай роль нелын ышталтын?» – йодым актрисе деч. «Валерий Григорьевын «Ава шӱм» пьесыж почеш шындыме спектакльыште Иринан образшым чоҥаш йӧсӧ ыле. Тушто тыглай йӱшӧ ӱдырамашым гына огыл, а драме шӱлышан рольым модман. Тудым марийже кыра, черле ӱдыржым интернатыш пуэн, каникуллан йоча аваж деке илаш кая. Спектакльыште мӱгырен-мӱгырен шортман. Чыла йӧсым эртен, ты марий дене тетла илаш огыл манын, шкаланже шке пунчалеш. Авторын лӱмгечыжлан пӧлеклалтше спектакльым ямдылышна. Тунам ты образым чоҥаш манын, шкемым пружиныште кучымыла кок кече коштынам, кӧргӧ вий-куатым погенам», – манеш Надежда.

УМБАКЫЖЕ «КУГАРНЯ» газетын 26 июньысо номерыштыже лудаш темлена.