Советский районышто ветеран Виталий Николаевлан «ушан пӧрт» системым вераҥдыме. Ты сомылым «Защитники Отечества» фондын Марий Элысе филиалжын полшымыж дене ыштат.
Патырлык орденын кавалерже В.Николаевлан чот тале лӱйкалымаш годым иканаште икмыняр осколко пурен. Йолташыжын утарымыжлан кӧра илыше кодын, но сусыргышо йолжым пӱчкаш логалын.
Землякнан илышыжым системе кеч изиш да куштылемдаш полша манын ӱшанена. Йӱкым пуымо команде почеш тудын пӧртыштыжӧ электротулым да прибор-шамычым ынде чӱкташ да йӧрташ лиеш. Тыгак кӱлеш кӱкшытыштӧ койко да кресле дене пайдаланаш йӧнан. Тылеч ончыч фонд Виталийлан следж-хоккейыште шуаралташ оборудованийым налаш полшен.