Вургемым налынам. Мӧҥгӧ толынам, размерже, тӱсшӧ да фасонжо мыланем келшен огыт тол гай чучеш. Тудым вашталташ лиеш мо?
Роспотребнадзорын Марий Эл Республикысе управленийже умылтара:
– Да, продовольственный огыл сату формыжо, кугытшо, фасонжо, тӱсшӧ але комплектацийже дене ок келше гын, кевытыш каен вашталташ лиеш («О защите прав потребителей» закон, 25-ше статья). Тидым 14 кече жапыште ышташ лиеш, налме кече огеш шотлалт.
Но сатум кучылтман огыл, пломбым, фабричный ярлыкым арален кодыман. Тыгак товарный чек але кассовый чек да тӱлымым пеҥгыдемдыше вес документ лийшаш. Но чек уке гынат, свидетельын пеҥгыдемдымыжлан эҥерташ лиеш.
Сатум вашталташ мийымыда кечын вес тыгай сату уке гын, оксам пӧртылташ йодын кертыда. Оксам кум кече жапыште пуышаш улыт.
Кутырен келшыме почеш сатум вес сату толмо кечын алмашташ лиеш.