Перинатальный рӱдерын кӱкшӧ технлогиян корпусшым чоҥен пытарыме. Кызыт тушто оборудований-влакым вераҥдат. Февраль мучаште тыште аза-влак ош тӱням ужшаш улыт. Идалык мучаште тушто приёмко лийын.
Кызыт республикысе 80 процент ӱдырамаш Йошкар-Олаште азам ышта. Кужу жап Юл кундемысе федеральный округышто лач Марий Элыште кызытсе жаплан келыштарыме перинатальный рӱдер лийын огыл.
У рӱдерыште чыла условийым ыштат, ӱдырамаш-влаклан квалифицированный медицине полышым пуат. Тыгак тӧнежыште пелаш-влаклан аза шочмо татым ончымо, тидлан полшымо услуго угыч лийшаш.
5,8 тӱжем квадратный метрым авалтыше кум пачашан у корпус кызытсе корпус дене ушалтеш. Икымше пачашыште приёмный отделений, мӱшкыран-влакын патологий да аза-влакын патологий отделенийышт посна лийыт. Тыгак воктеныже вашкеполыш машиналан кудал пураш йӧн ышталтеш. Кокымшо пачашыште ӱдырамаш-влаклан (9 койко-вер) да аза-влаклан(12 кювез) интенсивный терапий ден реанимаций пӧлка-влакым йӧнештарат. Кумшо пачашыште – азам ыштыме оперблок, 8 индивидуальный палате да 2 операционный. Ты корпусым чоҥаш 1,5 млрд утла теҥгем кучылтмо.
Перинатальный рӱдерын тӱҥ врачше И.Виноградован мутшо почеш, акушерствыште да неонатологийыште улшо у йӧн-влак дене у корпусысо оборудований-влаклан кӧра пайдаланаш лиеш.
«Тышке ӱдырамаш-влак чумыр республик гыч толаш тӱҥалыт, нунылан перинатальный, ультрозвуковой диагоностикым ыштена», – ойла тӱҥ врач.
Тиде шонымашыш шумо корно куштылгак лийын огыл. 2014 ий годсек кажне ийын рӱдерым чоҥаш Россий Минздравыш йодмашым колтымо.2019 ийыште Федераций Советыште кӱшыл палатын спикерже В.Матвиенкон полшымыж дене ты шонымашым кӱлешанлан шотлымо. А кызыт пандемий жапыште у рӱдерыш кузе инфекцийым пурташ огыл манме проблеме каҥашалтеш. Коронавирус дене вашлиялтше еҥ-влаклан посна полат ойыралтеш.
Перинатальный рӱдерын коллективше икоян. Тений республикыште 81 врачлан паша верым мумо. Ончыкыжым ты пашам самырык-влак утларак шукташ тӱҥалыт манын ӱшан шочеш.