Вӱд йымач луктыныт

Фото: УФССП РМЭ

Звениговышто 2019 ийыште вӱдыш пуреҥгайыше ледоколым мландӱмбак луктыныт.

Пристав-влак судышто сеҥымашке шуыныт. Судын решенийже почеш судным чоҥышо да ачалыше верысе завод вӱдыш пуреҥгайыше ледоколым серыш лукшаш.

«Портовый–5» утарыше буксир моло корабль дене пырля шуко жап заводын акваторийыштыже паша деч посна шоген. Тыге тудо 2019 ийыште шӱйын да вӱд пундашке каен.

Судно гыч нефть ден мазут йоген лектын огытыл гынат, тудо экологийлан да верысе пуш коштмылан (судоходствылан) лӱдыкшӧ лийын.

Судын пунчалже почеш, предприятий ледоколым серыш лукшаш ыле, но тудо ты сомылым шукташ вашкен огыл. Шке порысыштым шукташ нуным суд пристав-влак гына таратеныт. Кызыт, судным нӧлталын, серыш шынденыт.

Фото: УФССП РМЭ

Фото: УФССП РМЭ