Редакцийышкына лудшо деч серыш пурен: «Йошкар-Оласе ик кевытыш пурымекем, тыгай сӱретым ужым: ужалыше ден налше вурседылыт. Кевытыште арулык уке, пашаеҥ-влак шыде улыт. Эсогыл образованийыштат уке докан?»
Тиде серыш негызеш йодыштмашым эртаренна. Чыныш шуаш манын, кок могыржымат колыштман, сандене ужалышынат да налше влакынат шонымашыштым шергалына. Ужалыше ден налше еҥ-влак икте-весышт нерген мом шонат?
Алиса ВОЛКОВА, Шернур район:
– Еҥ-влак тӱрлӧ лийыт. Супермаркетыште пашам ыштенам, опытем уло, сандене уда койышан ужалыше шуэн вашлиялтеш манын пеҥгыдын каласен кертам. А сатум налаш толшо-влак коклаште торжа еҥым шуко ужаш логалын. Шкеныштым йӧршын кучен огыт мошто, ала-кӧ улам манын шонат. Ойлат, пуйто кевытыште пашам ыштыше еҥын образованийже уке. Чын огыл, йолташ-влак, шуко еҥжын кӱшыл шинчымашыже уло, южыштын – икмыняр дипломжо. Вет ятырын шке профессийышт дене пашам муын кертдымылан кӧра кевытышке логалыт. Ончылгоч иктешлымашым ышташ ида вашке.
Туге гынат поро кумылан еҥже шукырак. Ак шотышто чӱчкыдын умылыдымаш лектеш. Тунам кечыгут погынышо осал ужалыше ӱмбак «велеш».
Юлия КИРИЛЛОВА, Морко район:– Ужалыше еҥын торжан мутланымыжым чӱчкыдын колаш логалеш. Эсогыл шкеат тыгай ситуацийыш логалынам. Кевытыш пурымеке, порын саламлалтат, ласкан шыргыжалат, а ваштарешет пий семын урлен вашештымым колат. Кызытсе жапыште кевытыште ужалыше-влак веле огыл, а шукын вашла уда мутым ойлена. Южгунамже сыраташ огына шоно гынат, но шонымаш йоҥгалтын, еҥын кумылжо волен. Сандене кажне еҥ ондак шке койышыжым эскерышаш: поро кумылан, ныжыл чонан лийман.
Валентина ЧЕМЫШЕВА, Йошкар-Ола:
– Тӱрлӧ койыш-шоктышан еҥ-влак дене вашлияш логалеш. Икте порын саламлалтеш, мом налнеже – йодеш. Весе кычкырен кутыра, кычалтылеш. Шукыж годым чыташ логалеш, вет ме ужалыше семын торжан ойлен огына керт. Но южо еҥ сайын ойлымым, йодмым огеш умыло, сандене тудын семын туран вашешташ перна. Икана тыгай ситуацийышкат логалынна. Мемнан деке чӱчкыдын коштшо еҥ кевытыш йӱшывуя пурен да вурседылын. Икмыняр жап гыч уэш толын, эше «ночкырак» лийын да утыр вурседылын, пашам ышташ мешаен. Тунам меат шкеж семын торжан вашештенна. Кумшо гана толмыж годым шкенжым утыждене чытыдымын кучен, лӱмдылын, кидше денат шуын, сандене Росгвардийын пашаеҥже-влакым ӱжаш логалын.