Кеч-могай илемын, калыкын лӱмыштым посна айдеме чапландара. Пошкырт кундемысе Илиш район Красный Октябрь ялын чапшым Юрий Алексеевич Янгличев кӱшнӧ куча.
Юра – «Роснефть» компанийын грузовой автомобиль дене кудалыштше ик эн уста водительже. Тудо 2019 ий годсек шофёр-влак коклаште эртаралтше конкурсышто таҥаса. Тушко «Роснефтьын» индеш регионысо филиалже гыч 27 шофёр ушна. Конкурс Нефтеюганск, Отрадный, Ижевск, Уфа олалаште эртаралтын. Юрий 2023 ийыште гына кокымшо верыш лектын, молгунам эре икымше лийын.
Юран ачаже, Алёш чӱчӱ, пенсийыш лекмешкыже, эре машина дене кудалыштын. Тудо могай гына машинам виктарен, кушко гына миен огыл! Озаҥ, Свердловск, Челябинск кундемлаштат лийын. Алексей Янгличев – пагалыме шофёр, ӱшанле йолташ. Тудын дене пырля корныш тарваныше водитель-влак ойленыт: «Корнышто машина пудырген шогалеш гын, Алёш чӱчӱ нигунам кудалтен каен огыл». Ачалаш полшен, шокшо чайымат йӱктен. Арам огыл тудым пашажлан ятыр грамот дене палемдыме.
Ю.Янгличевын аваже Пелагея Павловна ялысе школышто туныктен. Изи Юра ачаж пелен машина воктен эре шогылтын: пӱтырен, рончен, ачален, мушкын. Варажым ачаже тудлан машина рульымат ӱшанен пуаш тӱҥалын.
Школым тунем пытарымекыже, Ю.Янгличев шофёр правам налын, армийыш кайымешкыже, машинам виктарен. Пӧртылмекше, пассажирский автопредприятийыште тыршаш тӱҥалын. Вара «Башнефть» компанийын верысе филиалышкыже куснен. Тудын машинаштыже эре сем йоҥга, кабиныже ару.
Юрий ешыж дене Дӧртыльӧ олаште ила. Алиса пелашыж дене кок ӱдырым ончен куштат. Кажне каныш кечын ача-авашт деке, Илиш районысо Красный Октябрь ялыш (Дӧртыльӧ марте 60 меҥге наре лиеш), миен толаш тыршат.
Ме Юрийлан да ешыжлан тазалыкым, у сеҥымашым тыланена. Шкендымат, калыкетымат умбакыже чапландаре, Юра!
Филипп БАЙТУКОВ.
Пошкырт кундем.