Марий кугыжаныш университетыште чолга, шонымашке шуаш тыршыше, тале марий ӱдыр-рвезе-влак тунемыт. Кажныжын – шке ойырен налме корныжо, сеҥымашыже да талантше. Нунын кокла гыч иктыже – Кужэҥер район Шорсола ялын ӱдыржӧ, Калыкле тӱвыра да тӱвыра кокласе коммуникаций институтышто икымше ий тунемше Татьяна Дмитриева.
Чулым кушкын
Таня изиж годсек усталыкше, мастарлыкше дене ойыртемалтын, чулым кушкын. Почеламутым сылнын лудын моштен, кушташат тале лийын, тыгак спортым йӧратен. Тӱрлӧ конкурсыш, таҥасымашыш ушнен, Шорсола тӱҥ школын чапшым шуко гана нӧлтен.
– Тӱҥалтыш класслаште танцевальный кружокыш коштынам. Тушто ме тӱрлӧ куштымашым шынденна, районысо конкурслаште, фестивальлаште сеҥышыш лектынна.
Шорсола школышто марий йылмым туныктышо Алевтина Максимовна Барабанщикова тӱҥалтыш класслаште тунемме годым почеламутым сылнын лудын моштымем шекланен шуктен. Тудлан кӧра мый ятыр конкурсышто лийынам да эре икымше верым налынам. Кугурак класслаште шымлыме пашалан кумылаҥынам. Кужэҥер районысо палыме еҥ-влак нерген шанче пашам возенам да районысо, республикысе конференцийлашке коштынам. 9-ше классыште тунемме годым Кужэҥер районышто «Идалыкын тунемшыже» конкурсышто сеҥенам.
Спортат илышыштем кугу верым налын. Ече дене мунчалтенам, куржталыштынам, баскетболла, футболла да волейболла модынам. Кызытат Шорсола ялысе команде дене модаш коштам. Шахмат дене мылам шинчылташ келша. Тидлан ачам куд ияш улмем годымак туныктен, – мане Т.Дмитриева
Шорсола тӱҥ школ деч вара Татьяна Советский районысо Ӱшнур кыдалаш школыш куснен, тушто социально-экономический направлений дене тунемын. Ты школыштат тудо моло деч ойыртемалтын. Руш йылме дене олимпиадышке чӱчкыдын коштын, районышто икымше верымат налын. Татьяна Дмитриева школым шӧртньӧ медаль да йошкар аттестат дене тунем пытарен.
Марий йылмым туныктышо
Ӱшнур школышто математикым, экономикым келгын тунеммыж дене Татьяна банк пашаеҥ але экономист лияш шонен улмаш. Но илыш корныжым йӧршеш вес профессий дене кылден: МарГУ-шко марий да англичан йылмылам туныктышо специальность дене шинчымашым налаш пурен.
– Ӱшнур школын директоржо Валерий Фёдорович Галкин икана мане: «Тыгак ончыко каяш тӱҥалат гын, марий йылме дене сай туныктышо лият». Тудын ойжым эре шотыш налынам. Туныктышо лияш шонышым. Тӱҥалтыште неле ыле, но варажым тунемалте. Идалыкыште ик занятийымат коден омыл. Телымсе сессийымат чыла «визытанлан» кученам, – пелештыш ӱдыр.
Студент жапым – пайдалын
Студент пагытшымат Таня сайын да пайдалын эртара. Ӱмаште мыскара койышыжым марий КВН-ыште устан ончыктен. Марий Эл Радион вӱдышыжӧ Ирина Петрован чумырымо командыштыже пырля тунемме йолташыж-влак дене модын.
А тений тудо вӱдышылан да вожатыйлан тунем лектын.
– 16 март гыч 11 май марте вожатыйлан тунемынам. Тудын могай лийшашыжым, йоча-влак дене кузе пашам ыштышашым пален налынам. Таир ер воктенысе «Журавушка» лагерьыште практикым эртенам. Тений кеҥеж канышлан лагерьыш пашам ышташ каяш шонем, – мане Т.Дмитриева.
Яра жапше годым ӱдыр йолташыже-влак дене вашлиеш, книгам лудеш, тыгак ялыш миен толеш. Шуко жапым тудо тунеммылан ойыраш тырша. Ӱдырын тӱҥ шонымашыже – университетым тунем пытараш да шке пашам сайын палыше специалист лияш.