Кундемыштына эртаралтше Марий самырык тукым слёт элнан тӱрлӧ кундемыштыже илыше марий самырык еҥ-шамычым кажне ийын кеҥеж кыдалне чумыра. Тений тушко Шернур район Кугу Пӱнчер ялын эргыже Кирилл Новосёловат икымше гана ушнен.
– Ты слётышто икымше гана лийынам. Мыланем моткоч келшен. Тыште мый у йолташ-шамычым муынам. Нунын дене жапым пайдалын да веселан эртаренам. Слётышто шинчымашым пойдарыме, уш-акылым пудыратыме шотышто ятыр мероприятий лийын. Мемнан дене кундемнам тӱрлӧ аланыште чапландарыше кугыеҥ-влак пашам ыштеныт. Поснак проект пашам вораҥдарыме шотышто шуко лекцийым, занятийым эртареныт. Социальный, тӱвыра, психологий аланым тарватыме, марий йылмым да историйым шымлыме, – каласкала самырык еҥ.
Шке тунемын
Кирил Новосёлов Кукнур кыдалаш школышто тунемеш, 9-ше классыш вончен. Тудо эше «Изи гармоньчо» фестиваль-конкурсын призёржо семынат палыме. Изи гармонист-влаклан шошым эртаралтше конкурсышто рвезе 2-шо вер дене палемдалтын ыле.
– 2023 ий декабрьыште гармоньым икымше гана кидышкем налынам. Ты семӱзгарым шокташ тунемашак шоненам. Чылажымат шкеак радамлен, ынде кокымшо ий тӱрлӧ семым луктам. Мо оҥайже: ешыштына да тукымыштына гармоньчо-шамыч уке улыт.
Ты семӱзгар мыланем моткоч лишыл. Кумылым нӧлтышӧ йолташемат манаш лиеш. Чонышто шӱлык але йӧсылык озаланыме годым, гармоньым кидыш налын, тӱрлӧ семым шокталтемат, пуйто чылажат мондалтеш, – палдара Кирилл.
Новосёловын ойлымыж почеш, тудлан шочмо Шернур вел семым шокташ утларак келша, но моло районласе мурымат кумылын келыштара. Кок ий жапыште гармоньчо чыла гаяк районын семыжым тунем шуын.
– Ончыкыжым эшеат сайын шокташ тунемаш шонем. Яра жапем лектеш гын, гармонь тыманмеш кидышкем логалеш. Эн ончычшо еҥ кид гыч налме семӱзгар дене шоктенам, а идалык ончыч у гармоньым налынам, – палдара Новосёлов.
Кирилл шкеак мура да семым шочыкта. Шукыж годым такмакым йоҥгалтара, тыгак авторский муро-шамыч дене пашам ышта.
Ялым эрыкта
Уста рвезын волонтёр пашам шуктымыжымат палемдыде огеш лий. Тудо ятыр акцийыште участвоватла. Кушко ӱжыт – тушко кая. Тыгак шочмо-кушмо верыштыже йырым-йырысе кумдыкым тӱзатымылан вуйын шога. Ялым эрыктымаште, памашым ачалымаште эреак тырша. Теве ялыште кушто мо улмо да кушко кайыме шотышто табличке-шамычымат шкеак ыштылын. Школын илышыштыжат чолгалыкым ончыкта: спорт таҥасымашлаштат, тӱвыра мероприятийлаштат.
Икманаш, ты рвезе, чынжымак чолга да тале. Лач тыгаяк лийман самырык-влаклан: куштылго, ӱшаныше да ончыко ончен моштышо!
К.Новосёловын альбомжо гыч налме фото.