Пошкырт кундем Мишкан район Ардаш ялын ӱдыржӧ Дарья Хамитова – «Памаш» еш ансамбльын участницыже, тылеч посна шочмо ялысе тӱвыра пӧртыштӧ культорганизаторлан пашам ышта, тӱрлӧ темылан марий статья-влакым воза.
Чолга студентке
Даша Уфа оласе Науко да технологий университетын Пӱрӧ оласе филиалыштыже тунемеш. Филологий да тӱвыра кокласе кыл факультетын кумшо курсын студенткыже. Руш йылме ден литературым туныктышо лияш ямдылалтеш. Тылеч посна журналистике дене кылдалтше ешартыш образованийым налеш. Д.Хамитова каласкала:
– Университетыште эртаралтше тӱрлӧ конкурсышто участвоватлем, фестивальлаште марий койышемым ончыктем. Статья-влакым рушлат, марлат возем. Мутлан, ӱмаште республикысе шанче да практике конференцийыште участвоватленам. Тушто «Г.Микай – туныктышо да возышо», «Г.Гордеевын «Вӱдвакш» ойлымашыже», «Мария Илибаеван прозыжо», «Аксар ден Юлавий» драмысе герой-влак», «В.Бердинскийын изи жанрыште тыршымыже, «В.Ивановын прозо жанрыште тыршымыже» шымлыме пашам-влакым шкешотан альманахеш савыктен лукмо.
Университет пелен «Проба пера» клуб ӱмаште октябрь гыч тӱҥалын май марте пашам ыштен. Клубын пашашкыже уло кумылын ушненам. Тушто журналистике дене кылдалтше шуко оҥайым пален налынам. Моло ӱдыр-рвезе-влак дене пырля «Победа» газет редакцийыште, типографийыште, Печатьын историйже тоштерыште лийынам. «Победа» газетыште изирак статьям савыкталтын. Университетыште тӱрлӧ мероприятийым эртараш полшымылан тауштымашан серыш-влакат улыт.
«Памаш» еш ансамбль
Дашан ачажым, Владимир Хамитовым, Пошкырт кундемыште шукын палат. Тудо Башкортостан Республикысе тӱвыран сулло пашаеҥже, «Памаш» еш ансамбльын художественный вуйлатышыже. Баян, тальянке, тӱвыр да моло семӱзгар-влак дене шоктен мошта.
– Мый ачам дене пырля Ардаш ялысе тӱвыра пӧртыштӧ культорганизаторлан пашам ыштем. Тӱрлӧ мероприятийым эртарена. «Памаш» ансамбльна дене конкурслаште мастарлыкнам ончыктена. Ансамбльыш чылаже кандаш еҥ коштына. Ачам, Галина авам, Таня ден Лена акам-влак, мый, ончаш налме Руслан ден Илона шольо ден шӱжарем да Дима тукымшольына. Ме чыланат марий такмак-влакым мурена, куштена да совлам перкалена. Ӱмаште Уфаште «Мама, папа, я – музыкальная семья» еш конкурсышто участвоватленна. Тушто калык семӱзгар денем арий наигрышым йоҥгалтаренна да кокымшо верым налынна. Полек шотеш мыланна 50 тӱжем теҥгеаш сертификатым кучыктеныт, – палдарыш Даша.
«Памаш» еш ансамбль марий тӱвырам вияҥдымаште чот тырша. Тудо 2015 ийыште шочын. 10 ий жапыште «Памаш» Пошкырт кундемыште палымыш савырнен. 2016 ийыште Нефтекамск олаште эртаралтше «Финн-угор транзит: еш йӱла» сымыктыш да калык усталык тӱнямбал фестивальын концертыштыже икымше гана выступатлен. Тылеч вара шуко конкурсын участникше лийын. Кажныштыже могай-гынат номинацийыште палемдалтын. Тудын участникше-влак чылан чолга, чулым, талантан да тӱҥжӧ марий шӱлышан улыт. Галина ден Владимир Хамитовмыт еш йӱла-влакым аралат, икшывышт-шамычлан марий улмышт дене кугешнаш, кугезе тукымын сугыньыштым шукташ изинек туныктат.
– Ешыштына йоча-влак марий семеш кушкынна. Авам ик конкурсышто выступатлымыж годым тыге ойлен: «Калык ок пыте тунам, кунам тудын тӱвыраже да йылмыже илат». Тидым ешыштына аралена. Да усталык номерна гоч шочмо йылмын, мурын ямжым калык чоныш шыҥдарена, – манеш Дарья.
Д.Хамитован альбомжо гыч налме фото-влак.