26-28 июльышто Крымыште самырык-влакым ушышо «Таврида-арт» шуко национальностян сымыктыш фестиваль эртаралтын.
Тушто Марий Эл гыч 26 еҥ лийын.
Ты мероприятийыш миен коштмо нерген «Таврида» арт-кластерын медиаамбассадоржо Маргарита Кутасова каласкалыш.
Маргарита «Хореографий коллективым вуйлатыше» специальность дене бакалавриатым да «Юл-Виче калык-влакын тӱвырашт» направлений дене магистрым йошкар дипломла дене тунем лектын. 1 сентябрь гыч – МарГУ-штак тӱвыра да сымыктыш кафедрын туныктышыжо.
– Фестивальыште лиймым пиаллан шотлем. Тушеч тӱҥалам: чыланат всетӱрлӧ пӧртылынна. Кумыл нӧлтшӧ командына мӧҥгеш толмыж годымак поездыште шкем усталык пашаште утыр кушмо нерген планым ышташ тӱҥалын. А кок кече эртымеке, нуным шукташ пижын!
Ме тушто эн ончычак площадкым ужна – моткоч кугу да сӧрал арт-объектан, чылажымат тӱрлӧ семын сӧрастарыме (сцене, павильон-влак кумда улыт, уремысе представлений, тул шоу, кафе да молат). Тыгайым ужмеке, мыйын гын капемлан копыж-ж чучо.
Программе моткоч поян ыле, мом ойырен налашат ӧрынна. Кажне шагатыште мастер-класс, спорт ден куштымо мероприятий, конкурс да артист-влакын выступленийышт лийыныт.
Ме, Марий Эл гыч мийыше-влак, арт-таҥошкылмашыште чыланат марий вургем дене лийынна. «Россия – семья семей» арт-таҥошкылмаште 3800 участник 3500 километр корным ошкыл эртен, тӱрлӧ калык мотор, виян да куатан улмыжым ончыктен.
Мыйын шонымаште, Таврида.АРТ лагерь улмо нерген шинчымашым налаш да вияҥаш тыршыше, икгай шонымашан еҥ-влакым вашлияш шонышо, моторлыкым аклен моштышо кажне самырык еҥ палышаш. Тыштак эллан кӱлешан шонымаш-влак вожым налыт!
Чынак. «Таврида-Арт» усталык еҥ-влаклан полшен да ончыкыжымат полша. Тиде йӧным кучылтманак!
Эльвира Терентьева.
М.Кутасован альбомжо гыч налме фото-влак.
