Йошкар-Оласе Г.Константинов лÿмеш Академический руш драмтеатрыште – у директор.
Ынде тиде театрын пашажлан тыште ятыр ий тыршыше актёр, режиссёр Ю.Синьковский вуйын шогаш тÿҥалеш.
Юрий Александрович – Марий Эл Республикын калык артистше, Россий Федерацийын сулло артистше. Тудо 1966 ийыште Ставрополь кундем Кисловодск олаште шочын-кушкын. 1990 ийыште Саратовысе Л.В.Собинов лÿмеш кугыжаныш консерваторийыште театральный пöлкам тунем лектын. Саратов, Брянск, Пермь, Орёл, Тамбов, Ульяновск олаласе, тыгак Москосо областной театрлаште пашам ыштен.
1990-1996 ийлаште Академический руш драмтеатрыште актёрлан тыршен, вара ик жап Москосо телевиденийыште пашам ыштен. 2002 ийыште Марий кундемыш пöртылын да таче мартеат руш драмтеатрыште тырша.
Республикысе да вес кундемласе калык тудым ий еда Козьмодемьянскыште эртаралтше «Бендериада» мыскара фестивальыште Остап Бендерын рольжым модшо семын пала.
