У Торъял район Шӱвылакыште илыше шуко шочшан Щербаковмыт еш тӱрлӧ вере чолгалыкше дене ойыртемалтеш. Нуно 2024 ийыште «Всей семьёй» Всероссийский проектын финалистше-влак радамыште лийыныт. Тыгак тӱнямбал кӱкшытан фотопроектын, шуко шочшан ача-ава-влаклан келыштаралтше ятыр марафонын, районласе фестиваль ден конкурсын, тӱрлӧ акцийын участникше улыт. Тылеч посна ты еш волонтёр пашам шуктен шога – СВО участник-влаклан тӱрлӧ семын полшаш тырша.
Эрыкым, яндар южым
Георгий ден Наталья школышто тунеммышт годымак палыме лийыныт. Профессионал шинчымашым налмеке, 2011 ийыште ешым чумыреныт. Тыге Кужнур ялысе ӱдыр ден Кугу Шӱвылак ялысе качын еш историйышт тӱҥалтышым налын. Кызыт Щербаковмыт ешыште ныл икшыве кушкеш. Наталья – Шернур районысо рӱдӧ эмлымверын У Торъял районысо больницыжын стационарыштыже терапевтический отделенийым вуйлата, Георгий «Первый Май» озанлыкыште водительлан тырша. Тыгак агроинженерий специальность почеш кӱшыл шинчымашым налеш.
Дипломым налше Наталья Геннадьевна верысе эмлымверыште терапевтлан тыршен. Самырык специалистын пашам сайын ыштымыжым ужын, жап эртымеке, тӱҥ врачын алмаштышыжлан шогалтеныт. А 2021 ийыште тудлан стационарыште терапевтический отделенийым вуйлаташ ӱшаненыт. Илаш – У Торъял посёлкышто кок пӧлеман служебный пачерым ойыреныт. Шуко шочшан ава кызыт нылымше икшыве дене декрет отпускышто. Садлан Щербаковмыт Георгийын шочмо ялыштыже илат.
– Оласе илыш мыланна келыштаралтын огыл гай чучеш. Ме эрыкым йӧратена. Пачерысе ныл пырдыж коклаште йоча-шамычлан да мыланнат шыгыр. А ялыште кажныже шканже келшыше сомылым ыштен кертеш, яндар южышто лиймыжак мом шога? – палемда Наталья.
Икшыве-влаклан — кугу тӱткыш
Илья – ача-аван икымше икшывышт. Тудлан 13 ий. Илья деч кок ий вара шочшо Анна изаж пеленак кушкын. Садлан самырык ача-авалан тидын шотышто куштылгырак лийын, палемдат нуно. Йоча-шамыч У Торъял посёлкысо тӱҥ школышто шинчымашым погат. Тыгак Э.Н.Сапаев лӱмеш йоча да сымыктыш школышто мастарлыкыштым нӧлтат. Илья баян дене шокташ тунемеш, Анна фортепианым шокта да хорышто мура.
– Йоча-шамычын яра жапышт укеат, манаш лиеш. Тунемме деч посна мӧҥгыштат тӱрлӧ сомылым вораҥдараш полшат. Вет ме ялыште илена, садлан паша эреак лектын шога, – манеш ава.
Ешыште тыгак кум ияш Эльза ден талукым эрталтыше Игнатийым ончен куштат. Эльзалан йокрок ынже лий манын, Георгий ден Наталья нылымше икшывым шочыкташ кумылаҥыныт.
– Нунат иза-акашт семын веселан кушкыт, – ойла Наталья.
Кеҥежым ешлан шуэнрак пырля лияш логалеш. Вет Георгий Иванович шуко жапым пасушто эртара. Туге гынат икшыве-влакым воспитатлымылан кугу тӱткыш ойыралтеш. Ава нуным пашам ышташ туныкта гын, ача чын айдеме кушкаш кӱлмӧ нерген умылтара. Тидыжым тудо шке примерже гоч ончыкташ тырша.
Жапым пайдалын
Кеч чылан пырля лийме тат шуэн лиеда, Щербаковмыт ты жапым пайдалын да веселан эртарат. Телым коньки дене мунчалтат, кеҥежым колым кучаш коштыт. Тыгак ешыштышт шахмат дене турнирым эртарат. Наталья Геннадьевнан ойлымыж почеш, тидыжым кажныже изин-кугун вуча.
– Шошым да кеҥежым пелашем – утларакшым пасушто. Ме тудым умылена. Пашаче улмыжым икшыве-влак ужын кушкыт, тидыже нунылан сай пример. Тыгак Георгий чеснокым кушташ кумылан. Ты пакчасаскам кугу кумдыкышто шында. Вес ийлан эше шукырак ыштен налаш шона. Ты сомылым вораҥдараш йоча-шамыч дене тудлан полшена. Пелашемын шкенжын тракторжо уло. Тыгак шудым солаш, оварташ да прессоватлаш лӱмын арверым наледен. Садлан солен верысе озанлыкыш сдатла.
Мый этнотӱрым тӱрлаш да модный вургем-шамычлан тӱрлӧ сӧрастарышым ыштылаш йӧратем. Садлан яра жап лийме годым тӱрлем, вара тудым бисер дене келыштарем, – каласкала шуко шочшан ава.
Марий тӱр-влакым шымлаш Наталья изиж годымак тӱҥалын. Ӱдыр коважын чийыме марий тувыржым кажне кечын куанен ончен. Кова тыгай вургемым ӱмбачше кудашынат огыл, манаш лиеш. Тыге Натальян шке калыкше да тудын вургемже деке пагалымаш утларак да утларак пеҥгыдемын. Шукыж годым шке кид дене шочыктымо сӧрастарышыже-влакым Наталья йолташыже да родо-шамычыжлан пӧлек шотеш пуэда.
У шӱлыш — полшаш
Щербаковмытын шуктымо вес поро пашаштымат палемдыде огеш лий. Уло ешге СВО-лан тӱрлӧ семын полшен шогат. Дождевикым, маскироватлалтме костюмым, йымал вургемым ургат, кукшо душым ямдылат, окопысо сортам велат, чеснок ден сукарам коштат.
– Йоча-шамычым поро пашалан туныкташ манын, ты сомыллан пижынна. Вет кунам чылан пырля чон йӱлен ик пашам ыштет, еш кыл пеҥгыдемеш, икте-весе коклаште умылымаш да пагалымаш шочеш. Ме тыгак уло еш дене тегыт негызеш шовыным шолташ йӧратена. Тидыжым изижге, кугужге кумылын шуктена.
Салтак-шамычлан полшаш шонымаш ешышкына у шӱлышым пуртен. Тидыже кажнынан пайдале лиймынам кугемден, шонем, – манеш Наталья.
«Илышым йӧраташ»
Лач тыгай девиз дене илат Щербаковмыт.
– Йӧратен ыштыме пашан лектышыжат куандарыше. Тидыжым койыш-шоктыш дене веле огыл, паша дене ончыктыман. Садлан пашалан вий-куатым чаманыман огыл. Кеч-могай сомыллан кумылын пижман. Тидлан уш-акылым пойдарыман, мастарлыкым таптыман, – манеш ава.
У Торъял районышто Щербаковмытым палыдыме еҥ укеат, очыни. Вет ты еш шке кундемжын чапшым ятыр конкурсышто арален. «Всей семьёй» проектымак налаш гын, нунын шуктен шогымо тӱрыс пашаштым кажне арнян фотоотчётышто ужаш лийын. Кажне фотосӱретыште шонен лукмо огыл, а чын илыш ончыкталтын.
Чынжымак, тыгай еш-влак дене куаныдежат огеш лий. Наталья ден Георгий ныл икшывыштлан веле огыл, моло-шамычланат жапым ойыраш тыршат. Тидыжым нуно поро пашам шуктымышт дене ончыктат. Тек Щербаковмытын суапле пашашт нунылан лу пачаш порылык дене пӧртылеш!
Еш альбом гыч налме фото-влак.