Марий Элым вуйлатыше Александр Евстифеев РФ чоҥымо паша да ЖКХ министр Владимир Якушевын селекторный совещанийыштыже участвоватлен.
Тушто икмыняр йодышым каҥашыме: эртыше олтымо тургымым иктешлымаш да 2020-2021 ийысе тургымлан ямдылалтмаш, организаций, еҥ-влакын услугылан тӱлен кертдымыштлан кӧра ЖКХ предприятий-влакын роскотыштым шагалемдымаш, онлайн-тӱлымӧ йӧн нерген еҥ-влаклан увертарымаш.
«Ме умылена, кызытсе ситуацийыште ресурс-влаклан шагалрак тӱлат. Мемнан задачына – ситуацийым стабилизироватлаш. Пашадарым налше еҥ-влаклан услугылан жапыштыже тӱлаш кӱлмӧ нерген умылтараш. Кӱсыным погаш сайжак огыл. Онлайн-тӱлымын пайдаж нерген умылтараш. Улшо сервис-влак нерген квитанцийлаште, кучем орган-влакын сайтыштышт, соцкыллаште вераҥдаш кӱлеш», – совещаний тӱҥалтышыште каласен В.Якушев.
Марий Элыште жилищно-коммунальный услугылан калыкын 1 млрд. 216 млн. теҥге парымже погынен. Кассе гоч 40% платёж окса кая. Самоизоляций режимлан кӧра еҥ-влак тудым ыштен огыт керт. Садлан ЖКХ услугылан оксам эше шагалрак тӱлаш тӱҥалыт.
2019-2020 ийласе олтымо тургым икшырымын эртен. Аварийный ден чрезвычайный ситуаций-влак лийын огытыл. Пашам ыштыдыме кече-влакым 30 апрель марте шуйымылан кӧра 6 апрель гыч южо бюджет организацийлашке шокшым пуымым чарныме. Тушко школ, йочасад, тӱвыра пӧрт, спорт сооружений-влак пурат.
2020-2021 ийласе отопительный сезонлан ямдылалташ манын, Марий Эл Республикысе чоҥымо паша да ЖКХ министерстве Марий Эл Республик Правительствын постановлений проектшым ямдылен. Тудын дене келшышын регионышто еҥ-влакын илышыштым саемдаш полшышо, тыгак социальный объект-влакым ончыкылык сезонлан ямдылаш тӱҥалыт. Тыгак пеҥгыде топливым кӱлеш наре ямдылаш да шӱй дене олтымо куд котельныйым газыш кусараш палемдыме.