Кодшо арнян Шернур посёлкышто спортплощадкым торжественно почмо. Тушко Марий Элысе спорт министр Сергей Мухортов ушнен.
Площадкым «Спорт России» кугыжаныш программе почеш ыштыме. Тудым калыкым спорт, физкультур дене заниматлаш кумылаҥдаш, таза илыш-йӱлам кучаш келыштарыме. Палемдыман, ты программым илышыш шыҥдараш полшымаште Марий Элысе Правительствынат надырже кугу. Республикысе бюджет гыч площадкым ышташ кум миллион теҥгем ойырымо. Ты окса дене кызытсе илышлан келшыше спорт оборудованийым наледыме да монтаж пашам шуктымо.
Шернур посёлкышто илыше-шамыч ынде у да йӧнан спортплощадкыште капкылыштым шуарен, жапым пайдалын эртарен кертыт. Ӧрканыман веле огыл!