– Школышто мыйым шукын «марийка» манын лÿмденыт, мыскылаш тыршеныт. Мый тидым шканем ÿмырешлан ушыш пыштенам. Илен-толын, ты «мыскылтыш» творческий лÿмышкем савырнен. Мый ынде Mariyka лÿман мурызо улам, – ойла Анна Иванова.
Анна изинек Йошкар-Олаште П.И.Чайковский лÿмеш сымыктыш школысо пелен пашам ыштыше «Гаммочка» студийыш коштын, мураш тунемын. Регионысо да Российысе ятыр муро конкурсышто ончыл верыш лектын. Тыгак кушташ, почеламутым сылнын лудаш йöратен. Тÿрлö вере сеҥымыжлан 2017 ийыште ÿдырым Крымысе «Артек» йоча рÿдерышкат колтеныт. Анна «Молодёжная волна» да «Шанс» (Йошкар-Ола), «Национальное достояние», «Созвездие талантов» да «Cheba JAZZ» (Шупашкар) Россий кÿкшытан конкурслаште икмыняр гана лауреат лÿмым сулен налын. Эсогыл Моско олаште эртаралтше «Будущее России» тÿвыра да сымыктыш шотышто III-шо Национальный премийын финалистше лийын, Кремльыште выступатлен.
Йошкар-Оласе 27-ше номеран школышто 9-ше классым тунем лекмеке, ÿдыр умылен: тудын ончыкылыкшо муро тÿня дене кылдалтшаш. Тыге Анна пошкудо Чуваший Республикысе рÿдолаште верланыше Ф.П.Павлов лÿмеш музыкальный училищын «Музыкальное искусство эстрады» отделенийышкыже тунемаш пурен, кызыт 2-шо курсышто тунемеш. Тыгак Шупашкарысе ик вокальный студийыште еҥ-влакым мураш туныкта.
А.Иванова мастарлыкшым композитор семынат шуара. Вконтакте соцкыл лаштыкыште Марийка лÿман мурызын икмыняр шке возымо пашаже-влакым ужаш, колышташ лиеш. Муро-влак кÿчык клипыште ончыкталтыт. Анна дене тунемме да усталык пашаже нерген мутланышна.
– Анна, икымше мурым кунам возенат? Кузе тиде шонымаш лектын?
– Чувашийысе музыкальный училищыш тунемаш пурымекем, шкалан шке ÿшанаш тÿҥалынам. Школышто мылам тиде шижмаш ситен огыл, жапат шагал лийын. Кызыт ты пашам вияҥдыме шотышто раш цель уло, мый тушко шуашак тыршем. А шонымаш тыгай – мурем-влакым миллион дене еҥ-шамыч йöратен колыштышт.
Мый кÿчык жапыште аранжировкым возаш, йÿкым семыш пышташ тунемынам, мурым возымаште мом шотыш налаш кÿлмым шымленам. Поп да хип-хоп жанран муро-влакым возем. Нуно кызытсе самырык-влаклан келшыше улыт. Икымше мурем тений луктым.
– Таче марте мыняр шке возымо мурет уло?
– Кызыт 10 ямде мурем уло, тышеч куд мурым луктынам, нуным Интернетыште муаш лиеш. 11 ноябрьыште у релиз ямде лийшаш. Тачеш мурем-влак рушла веле улыт. Но ончыкыжым мурышкем марла ой-влакым пурташ шонымаш уло. Ача-авам марий улыт гынат, марла шагал мутланат, садлан мый шкеже шочмо йылмем сайын ом пале, умылем веле. Ты амаллан кöра рушла веле возем. Но марла мурен моштем. Станислав Шакировын «Ой, йолташем» мурыжым, мутлан, эре куанен йоҥгалтаренам.
– Ала марий йылмым келгынрак тунемаш шонымашет уло?
– Кызытеш тидым ышташ нелырак, вет мый Чуваш Республикыште тунемам, илем. Училищыште ме чыланат чуваш йылмым тунемына, мурым шымлена. Мый чувашла джаз муро-влакымат мурем. Марий йылмым тунеммылан кызыт жапым ойырен ом керт.
– Мурым возаш мо кумылаҥда?
– Илышыште иктаж-мо чот сай лийын кая але, мöҥгешла, йöршеш йöсын чучеш. Кок пÿсö шижмаш. Тыге чон утарымашым кычалеш, да сем ден мут шочыт. Тидлан южгунам икмыняр минутат сита.
– Семÿзгар дене шоктет?
– Фотрепиано дене шоктем. Мый моторын кылдалтше аккорд-влакым кычалам, тунамак сем шочеш. Вара мут… Тыгак джазовый оркестрыште клавишан семÿзгар дене шоктем.
– Кузе шонет: мурымо але мурым возымо пашаште мо эн тÿҥ?
– Качестве да профессионализм. Мурын шке законжо да гармонийже улыт. Тидым умылаш гын, муро тÿня мучашдыме оҥай, сылне. Чаманаш логалеш, кызытсе муро аланыште профессионал-влакым парня дене шотлаш лиеш. Аккордым шокташ да мураш веле шагал. Кажне савыртышын кузе чоҥалтмыжым, кузе йоҥгалт кертмыжым умылаш кÿлеш. Шижман: молан тыге, а вес семын огыл…
Кызыт артист-влак моткоч шке вийыштлан ÿшанат, чолга улыт. Тиде – сай. Но шукыштлан чыла пашам продюсер-влак ыштен пуат, садлан мурышто яндар чон кумыл шагалрак шижалтеш.
Шкемым профессионализм шотышто моткоч шуарыме шуэш. Садланак тыршен тунемам, отличнице улам. Училище деч вара муро направлений денак кÿшыл шинчымашым налаш шонем.
– Анна, илышыштет тÿҥ шонымаш, девиз улыт мо?
– 16 ияшем годым вес олаш илаш куснымем годым моткоч лÿдынам. Тунам телефонысо тÿҥ экранешем «Мый чыла кертам» манын возыман сÿретым шындышым. Кажне гана кидышкем телефоным налме годым тиде возымым ужынам, лÿдмым сеҥаш тунемынам. Тиде сÿрет мылам неле пагыт годым моткоч полшен. Тыге тудо илыш девизышкем савырныш.
Такшым илышыште жапым арам йомдарыман огыл, шонем. Кажне татым пайдалын эртарыман.
– Тау тылат, Анна. Усталык корнет волгыдо лийже.