2026 ий – Тулан имньын идалыкше. Пиалым шке могырыш савыраш полшаш манын, У ийым чын вашлийман. Тидлан идалыклан келшышын пӧртым сылнештарыман, пӧлекым пӧлеклыман, вургемым чийыман, кочкышым ямдылыман.
Йошкарге – тӱҥ тӱс
Тӱҥ тӱс – йошкарге. Садлан пайремым вашлияш йошкарге, тӱкӧ, шӧртньӧ, нарынче тӱсан вургемым чийыман. Пиалым, поянлыкым, вий-куатым савыраш йӧн утларак ышталтше манын, куэмыште йылгыжше сӧрастарышан, порсын, бархат тувырым ойырыман. Нуно арун да моторын ургымо лийшаш улыт. Туржалтше, локтылалтше вургемым чиен, пиалым лӱдыктен кертыда. Тыгак шемалге-йошкарге, коралл тӱсым ойырен налаш лиеш. Имне дене кылдалтше аксессуар-влак образым кумдаҥдат. Ик ий мучко вий-куатда чыла сомылым вораҥдараш ситыже манын, ошо-шем да тӱсан чиемым ида нал.
Имне лийшаш
Имне – вийым, пашам йӧратымым, порылыкым, эрыкым ончыктышо вольык. Тудын тул тӱсан стихий дене иктыш ушналтмыже кугу куатан шижмашым, вий-куатым, энтузиазмым ешара. Садлан идалыкын символжо пӧртыштӧ обязательно лийшаш. Тыгодым эртыше идалыкын символжым кораҥдыман.
Пӧртым – пайремлан келшышын
Пӧрты але пачерысе интерьерым пайремлан келшышын сӧрастараш тыршыза. Ты сомылым У ий ӱстел гыч тӱҥалаш келшен толеш. Тидлан идалыкын символжым ушештарыше ӱстембал шовычым, кӱмыж-совлам ойырыза. Йошкар тӱсым ужарге дене келыштараш лиеш. Сервироватлыме годым тӱҥжӧ – йошкар тӱсым пурташ тыршыза.
Тыгак моло пӧлем-влакым тӱрлӧ шинчыр, мишура, гирлянде, кож укш дене сӧрастарыза. Тыгодым идалыкын тӱсшым эреак ушышто кучыза. Йошкар але тул арверым иктаж-кушко пижыкташак тыршыза.
Пӧлек чоным ырыктышаш
Пӧлекым ойырымо годым тулан имньын вий-куатшым шотышто кучыман. Лишыл еҥдан чонжым савыраш манын, кызытсе илышыште могай арвер йодмашан – ончылгоч ыҥлыман. Йолташ, коллеге, родо-влаклан иктаж-могай наборым пӧлеклаш сай лиеш. Пледым, тамле пушым шарыше настам, фотоальбомым але рамкым, вазым, гирляндым налаш келшен толеш. Нуно йырым-йырысе кумдыкым шокшо шижмаш дене темаш полшат. Уста шӱлышан еҥ-шамычлан хоббиштлан келшыше сатум ойырыза. Тыге моштымашыштым эшеат нӧлташ кумылаҥден кертыда. Идалыкын символжым кеч-кӧланат пӧлек шотеш пуаш келшен толеш. Садлан мо дене куандараш огыда пале – имне статуэткым пӧлеклыза.
Пайрем ӱстел
У ий ӱстембалне имне шыл гыч ямдылыме кочкыш лийшаш огыл. Тудын олмеш чыве, сӧсна шыл гыч иктаж-могай кочкышым ыштыза. Имне – шудым да кушкылым кочшо вольык. Садлан пайрем чес вегетараин кочкышлан поян лийшаш. Тӱрлӧ салат, закуско, пакчасаска да фрукт дене ӱстембалым сылнын сӧрастарыза. Ӱстембал покшеке имньын статуэткыжым вераҥдыза. Тудын йырже мотор тарелкаш кешырым, олмам, шурным пыштыза. Тыге тулан имньым пагалымыдам ончыктеда да суртышкыда пиалым пуртеда.
Алкоголь дене утыжым ида мод. Йошкар арака але шампанскийым тамлен ончаш лиеш. Тудымат сок, емыж гыч ямдылыме морс, шудо чай, мохито дене алмашташ келшен толеш.
Облепихе гыч ямдылыме глинтвейн
Кӱлыт: 350 г облепихе саска, 1 кугу апельсин, 4 кугу совла сакырложаш, 1 л вӱд, пел лимон сок, 3 бадьян, 2 укш розмарин.
Облепихе саскам сайын туржса. Апельсиным пел тыртыш семын пӱчса да чайникыш пыштыза. Тушко туржмо саскам да шолшо вӱдым ешарыза. Солык дене леведса. Ты жапыште сиропым ямдылыза. Сотейникыште 50 мл вӱдыштӧ сакырым шулыктарыза. Тушко лимон сокым пыштыза да нугыдеммешкыже шолтыза. Чайникыш сиропым, бадьяным, розмариным ешарыза 10 минут шинчыктыза. Тамлыме деч ончыч икмыняр тичмаш облепихе саскам пыштыза.
«Поҥго пасу» салат
Кӱлыт: 300 г чыве филе, 3 пареҥге, 2 муно, 2 шинчалтыме кияр, 200 г шампиньон, 50 г грецкий пӱкш, 100 г ӱмбал, пел изи совла горчице, 2 пӱй чеснок, йоҥыштымо шем пурыс, ушкал ӱй.
Шампиньоным тыгыдемден пӱчкедыза да ушкал ӱйыштӧ жаритлыза. Тушко шинчалым, йоҥыштымо пурысым ешарыза. Йӱкшыктарыза. Шолтымо пареҥгым тёрко гоч нӱжыза, муным, шылым, шинчалтыме киярым кубик семын тыгыдын пӱчкедыза. Горчице, ӱмбал да пресс гоч колтымо чеснок гыч соусым ыштыза. Салатым лончо дене оптыза. Икымше ден пытартыш лончым пареҥге гыч келыштарыза, молыжым – шканда келшышын. Кажне лончыш соусым йыгыза. Салат ӱмбалым тыгыдемдыме грецкий пӱкш дене сӧрастарыза.
«Тунец корзиҥга» закуско
Кӱлыт: 10 тарталетке (закускылан лӱмын ужалат), 1 банке (200 г) консервироватлыме тунец, 2 кугу совла консервироватлыме кукурузо, 2 шолтымо муно, 1 шинчалтыме кияр, 1 вуй шоган, 3 кугу совла майонез, 1 изи совла горчице, 1 изи совла 9% уксус, шинчал, сакырложаш, йоҥыштымо шем пурыс, укроп, оливке.
Муноптемым вилке дене лаштыртен тыгыдемдыза, ошым кубик семын пӱчкедыза. Тунец банке гыч уто вӱдым йоктарыза да вилке дене шалатылза. Шоганым тыгыдын пӱчкедыза. Тушко шинчалым, пурысым, сакырложашым, уксусым ешарыза да 7 минутлан кораҥдыза. Шинчалтыме киярым кубик семын тыгыдын падыштыза. Чыла ингредиентым ушыза, майонез да горчице дене сайын варыза. Ямде вартышым тарталеткылашке оптыза. Маслине да укроп дене сӧрастарыза.
«А-ля Париж» салат
Кӱлыт: 200 г ушкал шыл, 4 пулдырчо муно, 2-5 шт черри помидор, 1 вуй шоган, 1 шинчалтыме кияр, 2 лышташ гыч пекинский ковышта ден салат, 1 пӱй чеснок, 50 г творожный сыр, 1 кугу совла натуральный йогурт, шинчал, йоҥыштымо шем пурыс, оливке.
Ушкал шылым тыгыдын квадрат семын пӱчкедыза. Тушко шинчалым, пурысым шавалтыза. Пресс гыч колтымо чеснокым, сырым, йогуртым варыза да шылыш ешарыза. Тудым 20 минутлан кораҥдыза. Муным ныл ужашлан, помидорым пеле гыч пӱчса. Пекинский ковышта ден салат лышташым кӱрыштса. Шоганым пел оҥго, киярым кубик семын падыштыза. Салат покшеке шылым пыштыза да моло ингредиент дене сылнештарыза. Тӱҥжӧ – ида варе.
У идалыкым чын тӱҥалза!
1 январьын икымше пелыштыже шкешотан ванныйым приниматлыза. Тудым кузе шонеда – туге келыштарыза. Мутлан, йӧратымашым вашлийнеда гын, вӱдыш роза пеледыш лышташым пыштыза. Поянлык кӱлеш – ванне тӱрыш тыгыде окса курыкым ыштыза. Тазалыкым йодыда – вӱдыш эмшудо гыч ямдылыме вартышым ешарыза.
У ийым вашлийме деч ончыч тендан шонымашдам сайын почын ончыктышо фото-влак гыч картым келыштарыза.
*ИИ полшымо дене ыштыме фото.