Вашке эн вучымо пайремым – У ийым – вашлияш тӱҥалына. Кажне еҥ тидлан кӱлынак ямдылалтеш – пайрем шӱлышым пурташ тырша.
Тӱрлӧ семын…
Кызыт шукынжо пӧртышкышт искусственный кожым шогалтат. Тудым ик гана налат да ӱмыр мучко пайдаланен кертат.
Кож могай гына огеш лий?! «Принцесса», «Королева», «Олимпийская», «Императорская» да молат… Пӱнчат тыгак шке моторлыкшо дене ойыртемалтеш. Ятыр еҥ тыгай пушеҥгым шогалташ кумылан. Кызыт чылажат оксаш миен тӱкна.
Искусственный кожлан ак кевытлаште ойыртемалтеш. Кугурак ужалыме рӱдерлаште шергынрак ужалат гын, изирак кевытлаште тугайымак шулдынрак налаш лиеш. Тыгак кожым ыштыме годым могай материалым кучылтмым, тудын кӱкшытшым, дизайнжым шотыш налман. Кок метр кӱкшытан кожым кокла шот дене 5000 але утларак теҥгелан налаш лиеш. Тылеч изиракше 1,8 метран, 1,5 метран да 1,2 метран улыт. Мутлан, 1,5 метр кӱкшытан «Олимпийский» кожым ныл тӱжем утла теҥгелан налаш лиеш. Пӱнчым кож деч шулдынрак ужалат. Тыге 1,5 метр кӱкшытан ты пушеҥге кок тӱжем теҥгеш шуэш. Южо еҥым гын изи кожат моткоч куандара. Тыгайже утыжым шерге огыл. Ик тӱжем теҥге марте чонлан келшыше кеч-могай изи пушеҥгым налаш лиеш.
Бант, шар…
Кожым сӧрастараш кызыт могай гына модышым огыт ужале. Кевытлаште У ийлан пӧлеклалтше витриным ончаш тӱҥалат гын, пел кечым тушто эртараш лиеш. Шарже, йомакысе геройжо, тӱрлӧ шӱдыржӧ, йылгыжше бантше, гирляндыже да молыжат… Еҥ-влак кожым тӱрлӧ семын сӧрастарат. Мутлан, йошкарге ден шӧртньӧ, пелганде ден ший, ошо ден ошалге-йошкарге, ужарге ден кӱрен тӱсан модыш-влакым кучылтыт. Тылеч посна тӱрлӧ бантым, пеледышым, шерым сакалтат. Модыш-влакым кугу упаковко дене наледаш шулдынрак шуэш. Ик тыгай упаковкышто кумло але утларак модыш уло. Ак кокла шот дене 300 теҥгеш шуэш. Южо кевытлаште ик упаковкышто лӱмын кок тӱрлӧ тӱсан модышым ужалат. Тыге кожымат сӧрастараш куштылгырак. Бантым тыгак упаковко дене налаш пайдалырак. Ик упаковкышто – вич бант.
Йыли-юли чолгыжеш
Кожым сӧрастарыше ик эн кӱлешан атрибутлан, очыни, гирлянде шотлалтеш. Вет южо еҥ модышым кожыш огешат сакалте, мотор гирлянде дене пӱтыралеш да сита манын шона. Гирлянде тыгак тӱрлӧ лиеда: шонанпыл, ошалге але кече тӱсан да канде. Нуно тӱрлӧ режим почеш йыли-юли йӱлат, У ий кожым путырак сылнештарат да волгалтарат. Пытартыш жапыште «лупс» гирлянде ик эн модныйлан шотлалтеш. Лампычкышт лупс гаяк изи, моткоч шыман да ныжылгын чолгыжеш. Гирлянде-влакын акышт нунын могай кужытан улмышт деч шога. Мутлан, коло метран «лупс» гирляндым 500-600 теҥгелан налаш лиеш гын, 30 метраным – 700 але утларак теҥгелан.
Тыгак кызыт шарча форман гирлянде дене окнам моткоч сылнын сӧрастарат. Нуно 3х3, 3х2, 2х2 форматан улыт. Тыгак тӱрлӧ тӱс дене тӱрлӧ режимыште чолгыжыт. Акше 400 теҥге гыч тӱҥалеш. Тылеч посна шке пӧртыштӧ илыше-влаклан тӱрлӧ сату темлалтеш. Вет мемнан кундемыштынат шагал огыл еҥ шке пӧртшым У ийлан лӱмын сылнештара.
Кож йымалне
Кожым сӧрастарымеке, йырым-йырысе кумдыкшымат сылнештараш сай. Тыге кож йымаке Йӱштӧ Кугызам, Лумӱдырым, Лумъеҥым, чодырасе янлык-влакым, 2023 ийын символжым — Кроликым (шем пырысым) вераҥдаш келшен толеш. Пӧлек-влакым моторын вӱдылмӧ коробка-влак У ий кожлан ойыртемым пуртат, тудым эшеат пояным да сылным ыштат. Тыгай арвер-влак шулдыжак огытыл. Чыла иктеш налман гын, шагал огыл оксам луктын пыштыман. Сандене тений иктыжым, вес гана весыжым налаш утларак йӧнан. Икмыняр ий гыч кож йымалныда шкешотан йомак шочеш. Тыгак нуным шке кид дене ышташ лиеш, но тидлан материалым наледыман, жапым ойырыман.
Идалыкын символжо – Кролик (шем пырыс)
2023 ий вӱдысӧ шем Кроликын идалыкше. Суртышто ты янлык дене кылдалтше иктаж арверым вераҥдыман. Календарьым, магнитикым, сувенирым налаш келшен толеш.
Тылеч посна пӧртысӧ иктаж лукым У ий шӱлышан поделке, шӱдыш дене сылнештараш лиеш. Тидлан чодырасе кож укш, тӱрлӧ ший, модыш полшен кертыт. Икманаш, фантазий да кумыл веле лийман. У ий чонышто эреак волгыдо кумылым, юзо шӱлышым ылыжта. Сандене тенданат, лудшына-влак, чоныштыда тыгай шижмаш озаланыже!
Лудшына-влак коклаште У ийым кожым кузерак сылнештарат? Могай дизайнлан эҥертат? Фотосессийыш коштыт мо? Лӱмын костюмым наледат мо?
Виктория Воронцова, Медведево посёлко:
— Мый кажне ийын кожлан у сыным пурташ тыршем. Модыш-влакым, гирляндым вашталтылам. Мутлан, тылеч ончыч пелганде тӱсан гирлянде кожышто чолгыжын гын, тений кече тӱсан лиеш. Ӱмаште кок метр утла кӱкшытан искусственный кожым пачерышкынна налынна. Кум тӱрлӧ тӱсан шар-влак дене тудым сӧрастаренам: ошалге-канде, пелганде да ший. Тыгак кож йымаке светильникым, тӱрлӧ янлык-влакым шындылынам. Тидлан лу тӱжем утла теҥге каен дыр. Тений кок икшывем йочасадыш кошташ тӱҥалыныт. У ий пайремлан гномикын костюмжым лӱмын налынам. Мемнан дене кевытлаште костюм 700 теҥге шога. Интернет кевытыште иктыжым 350 теҥгелан налынам.
У ийлан кожым кодшо арнянак сӧрастаренна, костюмнат уло. Икманаш, пайрем вашлияш ончылгоч ямде улына!
Елена Рыбакова, Оршанке посёлко:
—Мый кеч-могай мотор арверым наледаш йӧратем. У ийланат кажне ийын модышым вашталтылам. Садлан мыняр шийвундым тидлан луктын пыштенам, омат пале, шотленат омыл.
Йӱла почеш У ий кожым Даша да Маша ӱдырем-влак дене декабрь тӱҥалтыштак сӧрастарена. Тений йошкарге, ошо, ший тӱсан модыш-влакым сакалтылынна. Ӱдырем-влак кож вуйыш шӱдырым черет дене шогалтат. Мутлан, ӱмаште Маша шогалтен гын, тений Даша. Тылеч посна пачернам тӱрлӧ тӱсан гирлянде, занавес-влак сылнештарат. Ик лукышто каминым ыштыме, тудланат У ий шӱлышым пуртымо.
