Сеҥымаш тоштер, Россий Почто да Оксана Фёдорован поро кумылым ончыктымо фондшо «Сеҥымаш ёлко» У ий открыткым ыштыме конкурсыш ушнаш ӱжыт.
Сеҥымашым кондышо 1945 ийым вашлияаш ямдылалтме нерген шонкален ончаш темлат: сар жапыште кузерак кожым сӧрастареныт, кожыш сакаш могай модышым шке кид дене ыштеныт, мом У ийлан пӧлекленыт. Тӱҥжӧ, сӱретыште «Сеҥымаш кож» лийшаш.
Сӱрет-влак тудо жаплан келшен толшаш улыт, тушто пайремлан ямдылалтме шӱлыш шижалтшаш. Открыткым ыштыме годым кугезе коча-кова-влакын каласкалымыштлан але еш архивысе фотографий-влаклан эҥерташ лиеш. Открыткышке негызлан еш историй возын гын, тудын нерген ойлымашымат возен колтен кертыда.
Паша-влакым Сеҥымаш тоштерын сайтышкыже 28 ноябрь марте вераҥдыман. Нуным 6-8, 9-11, 12-14, 15-17 да 18 ияш деч кугурак-влак (кугыеҥвлак) коклаште посна аклаш тӱҥалыт. 1 гыч 9 декабрь марте Сеҥымаш тоштерын сайтыштыже онлайн-йӱклымаш лиеш. Эн шуко йӱкым погышо сӱретын авторжылан «Зрительский симпатий призым» пуат.