У ий дене!

Рита ТОЙШЕВА, Марий Элын сулло врачше:

2020 ий пандемийлан кӧра неле лийын гынат, шуко куанле событий ушеш кодын. Мый Маррий калыкын XI погыныштыжо «Саскавий» ӱдырамаш ушем деч делегат лийынам. Педиатрлан 30 ий пашам ыштымемлан тений «Марий Элын сулло врачше» лӱмым пуымаш умбакыжат утларак сайын тыршаш ӱшаным да вийым ешара. Ешыште уныка шочмо дене пиалан кова улмем шижам да йывыртем. Тек эртыше ий сай да волгыдо шарнымашым веле кода.

У ий – кажнын эн вучымо пайремже. Еш пиалда тичмаш, тазалыкда пеҥгыде лийышт. Тӱҥалме пашадам умбакыжат шукташ кумылда да вийда ситышт. Чыладамат шушаш У ий да весела Рошто пайрем дене!