У ий дене!

Светлана ОСИПОВА, мурызо, Марий Элын калык артисткыже:

2020 ийыште коронавирус черлан кӧра концерт-влак шагал лийыныт. Артистлан выступлений деч посна илаш нелырак, садлан тыгай жап писынрак эртыже манын шонена. Но каныш жапым мый пайдалын кучылтынам. Тений кеҥежым кок тылзе наре пачерыштем ачалыме пашам ыштыме. Обойым, мебельым вашталтыме. Южо мебельжым эше налаш кӱлеш. Ынде йырымваш мотор да ошо, чон куана. Кеҥежым ӱдырем-шамыч дене пырля шочмо Пошкырт кундемышкем унала миен тольым. Моткоч сайын каненна: снегым погенна, олыкыш коштынна, йӱштылынна.

Йочам-шамычат куандаренак шогат, мыйын вет нылытын улыт. Кугурак эргым, Женя, Мурманскыште ила да «Североморск» корабль дене пел ийлан плаванийыш коштеш. У ийым вашлияш ешыж дене мемнан деке толнеже. Максим эргым вес ий Марий радиомеханический техникумышто нефтегазовый факультетым тунем пытарышаш. Маша ӱдырем кумшо классыш коштеш, Сима – йочасадыште. Чылан таза улына, тау.

Вес ийлан тыгай осал чер мемнан деч кайыже. Коронавирус манме мут ынжак лий. Чылалан тазалыкым тыланем. Пиалан лияш манын, эн ончыч лач тазалык кӱлеш