2 ноябрьыште республикысе Изосымыктыш тоштерыште кок ончер почылтеш. Иктыштыже Российысе сӱретче-влак ушемын Марий Элысе пӧлкажын художникше-шамычын Марий кундем нерген войзымо пашашт ончыкталтеш гын, весыштыже Мира Аргунован сӱретше-шамычым чумырымо.
Сӱретче-влакын пашашт гоч Марий кундем нерген палдарыме ончер кажне ийын эрта. Тушто эреак у экспозиций, лӱм, теме почылтеш. Тушко самырык сӱретче-влакат ушнат. Тенийысе ончер кызытсе илышлан келыштаралтше тематикылан поян лиеш.
Мира – Якутскышто ила да пашам ышта. Тудо якут-влакын эпосышт, мифышт, йомакышт негызеш тӱрлӧ сӱретым сӱретла. Художнице тӱс дене сайын модеш, техникым устан кучылтеш, садлан сӱретысе сюжет-влак у семын ончыкталтыт. Палемдыман, М.Аргунован ончерже ятыр элыште ончыкталтын.