Тыге ойла Морко район Унчо селасе книгагудышто 35 ий наре пашам ыштыше Л.Ямнеева.
Пашаште – 35 ий наре
Пошкудо Шлань ялын шочшыжо Лидия Геннадьевна Йошкар-Оласе культпросветучилищым тунем пытарен. Ик жап шке ялысе клубышто пашам ыштымеке, книгагудыш куснен. Тиде вер ынде чылт шке мӧҥгем гаяк чучеш, вет уло ӱмырем тыште эртарем манын книгагудо нерген ойла ӱдырамаш. Кызыт Лидия Геннадьевна ешыж дене дене Унчо селаштак шке чоҥымо пӧртыштӧ ила.
Вашлиймашым, пайремым эртарат
– Эрдене толам, формуляр-влакым радамлем, кӧ могай книгам лудын, журналыш оформитлем. Пӧртылтымӧ книгалам веран верышкышт шогалтем. Кеҥежым книгам лудшо уке манын шонымо йоҥылыш лиеш. Каникул жаплан ола гыч ялыш шогаш толшо ӱдыр-рвезе-шамычлан школыштышт литературым лудаш пуат, садлан нуно мемнан дек книгалан коштыт. Ялысыже шагалрак толыт, – каласкала книгагудо пашаеҥ.
Книгам темлыме деч посна Унчо книгагудышто ятыр мероприятийым ямдылат. Кеҥежым лагерьыш коштшо йоча-влак дене тӱрлӧ вашлиймашым, пайремым эртарат, тидланже книгагудышкат ӱжыт, шкештат лектын коштыт.
Книгагудо пелен «Кӱдыроҥгыр» ӱдырамаш клуб пашам ышта. Кугурак ийготан-влак, погынен, кутыралтен шинченат, мурым мурат, иктаж пайрем лӱмеш мероприятийым эртарат. Вес район гыч уна-шамычым ӱжыт, шкеат чӱчкыдын лектын коштыт. Экскурсий дене Йошкар-Олаш, Юрино посёлкыш, Раифский источникыш, Марий Швейцарийыш да моло вере кудалыштыт.
Шагалрак, но лудыт
– Ӱдырамаш-влак марла возымо прозым лудаш йӧратат. А пӧръеҥ-шамычлан детектив-влак келшат. Ондакысе семын шуко лудыт манын ом керт, но огыт луд манмат келшен ок тол. Фонд тоштырак гынат, книгагудыш толшо кажне еҥ шке книгажым муэш. Пелен налыт веле огыл, толын шинчыт да газет ден журналым шергалыт, – манеш Л.Ямнеева.
Тунемше-шамыч школысо книгагудо дене пайдаланат, могай книгам тушто огыт му, мемнан деке куржын толыт. Нуныланат мероприятийлам чӱчкыдын эртарем. Тыгодым видеосюжетым ямдылем, спектакльымат модын ончыктена, икманаш, кумылыштым савыраш ятыр йӧным кучылтына. Йочасад гыч книгагудышкына экскурсий дене толыт.
Мый шкеже кажне марий газет ден журналым лудам манын палемдыш книгагудо пашаеҥ. Книгагудышто вер шагалрак гынат, тушто мӧҥгысӧ гай сай, эре толмет шуэш. Тошто пу оралтым (тудым эше 1967 ийыштак чоҥымо) коҥгаш олтен ырыктат. Пу гыч ыштыме тӱрлӧ арвер да модыш, мотор кушкыл-влак ты верлан поснак ямым пуртат да вес ганат толаш кумылаҥдат.
Авторын фотожо.