Ты пашам чон канен, ласкан ыштыман

 Лидия Васильевна Веткинам ме уста тӱрлызӧ семын палена. Тудо кумло ий утла акрет годсо марий тӱрым тӱрла. Ятыр конкурсышто шке вийжым терга, Марий кундемым тӱнямбал кӱкшытыштӧ чапландара.

 

  • 2009 ийыште Лидия Васильевна тӱвыра да сымыктышыште тыршымыжлан «Йыван Кырля 1909-2009» медаль дене наградитлалтын.
  • 2011 ийыште Россий Федераций Правительствын «Душа России» премийжым налын.
  • 2011 ийыштак «Жизнь, расшитая на холсте» выставкым чумырымыжлан Марий Эл Республикысе И.С.Палантай лӱмеш Кугыжаныш премийын лауреатше лӱмым сулен. 

Лидия Васильевна Шернур район Тамшэҥер ялыште шочын-кушкын. Лажъял школышто шинчымашым налмеке, ЙошкарОласе медучилищыште медсестралан тунемын. Шернур посёлкысо рӱдӧ эмлымверын терапий отделенийыштыже 30 ий пашам ыштен.

Тошто тӱрым тӱрлаш кӧ туныктен?

– Изи годым карта (вафельный) солыкыш тӱрленна. Акрет годсо тӱрым иктаж кумло ий ондак ышташ тӱҥалынам. Ончыч спорт дене пеҥгыде кылым кученам, ече дене ӱчашымашке коштынна. А вара профсоюз пытен кайыш, да таҥасымаш-влакат йомаш тӱҥальыч. Чон аламом ышташ, ала-кушко каяш йодын. Тунам кидпашам ышташ пижым. Мондалташ тӱҥалше, йомшо тӱр-влакым ышташ кумылаҥым. Авам Елизавета Тимофеевна Волкова акрет годсо марий тӱрым тӱрлаш туныктен.

– Икымше кидпашада могай лийын?

– Ты пашам тачат аралем. Тиде – шымакш. А вара Параньга район Пумарий почиҥгаште илыше мӱндыр ковам деч тошто марий вургемжым конденам. Тувыржым, шовыржым, кум лукан шовычшым, шымакшыжым шымлен, уэмден, шканем тӱрленам. Шийаршаш, ший ӱштӧ, оҥылаш йымал сӧрастарыш, кидйолва – чылажымат шкеак ямдыленам.

– Икымше гана могай конкурсышто мастарлыкдам тергенда?

– Тувыр-шовырым, шовычым ыштен шуктымеке, 2000 ий 7 апрельыште тӱвыра да сымыктыш колледжыште марий вургем конкурс эртаралтын. Тунам мыйым гран-при дене палемденыт. Вара солыкым, ӱстелшартышым, ӱштым тӱрлен, ятыр конкурсышто лийынам, шуко вере ужын-коштынам.

2019 ий 25 июнь гыч 25 август марте калык прикладной-сымыктыш тоштерыште «Кайыккомбо кашта» выставкем лийын ыле.

 – Марий тӱрыштӧ – пеш шуко тамга. Тудо мом-гынат ончыкта. Тидланат авада туныктен коден?

– Авам каласкален, шукыжым Евсеев лӱмеш тоштерын научный пашаеҥже Н.А.Большова ойлен. Тудо шымлыме пашаж гыч тамга-влак дене палдарен. Тоштер гыч шовычым арня жаплан конден, тамгам ончен тӱрленам.

Умбакыже 8 майыште лекше газетыште лудса.