Морко кундемыште илыше да музык тӱняште чапланыше Токташевмыт ешыште пайрем еда марий калык муро йоҥген.
Кызыт Александр Касьянович ден Зинаида Порфирьевнан Эльвира ден Алевтина ӱдырышт мурызо семын палыме улыт. Коктынат И.С.Палантай лӱмеш тӱвыра да сымыктыш колледжым тунем пытареныт да илышыштым тӱвыра дене кылденыт. Ольга ӱдырыштат – творческий еҥ, модельер-конструктор лийын.
Тений апрельыште Токташевамыт (чыланат ӱдыр-ӱдырамаш-влак!) Морко районын 100 ияш лӱмгечыжлан пӧлеклалтше «Шочмо велын мурсемже» концертыште выступатленыт. Тунам Зинаида Порфирьевна кок ӱдыржӧ да кум уныкаже дене пырля Э.Токташева ден Р.Искакован репертуарышт гыч «Муро – чон кумылем» мурым келыштареныт. Тыште Алевтинан Александра, Эльвиран Юлия ӱдырышт муреныт, а Ольган Анна ӱдыржӧ блокфлейте дене шокталтен.
Ава да кова деч куснен?
Ӱдыр-влаклан мурымо талант ден артист койыш ава шӧр денак кусненыт, очыни. Нуно аваштын малтыме мурым йоҥгалтарымыштым огыт шарне, вет тидым утларакше ковашт Зоя Григорьевна Глушкова ыштен.
Изи улмышт годымак аваштын да нунын акаштын пайремышт але тыглай погынымышт годым яндар йӱк дене муралтымыштым куанен колыштыныт.
– Модо ден сымыктышлан мемнам авана кумылаҥден. Тудо шкежат мураш йӧрата. Самырык пагыт гычак Морко калык театрыш коштын. Изиракна годым тудым жаплан коден каен, а кызыт адакат тушто мура, кушта да у роль-влакым модеш, – каласкалыш Эльвира.
Ятыр коллективыште
Изи Алюк шым ияшак музыкальный школыш кошташ тӱҥалын, фортепиано дене шокташ шым ий тунемын. Хорышто солистке лийын. Школыштат конкурслаште мурен. Морко ПТУ-што культорганизаторлан тунеммыж годым «Энсул» ансамбльыш ушнен, кок ий тушто мурен.
Алевтина (кызыт тудо Степанова) колледж деч вара Морко тӱвыра пӧртыштӧ пашам ышташ тӱҥалын, тачат туштак. Тылеч посна МарГУ-м тунем лектын. Ынде ятыр ий «Морко кундем» коллективыште мура. Морко академический хорыштат тудым ужынна. Александра (Сашенька маныт) ӱдыржат путырак палымыш савырнен ыле. «Ош пыл-влак», «Ковамлан», «Аваем» да моло Марий Элысе радиофондлаштат аралалтыт.
Алевтина кум шочшым ончен кушта. Александра ынде марланат каен, Озаҥыште ила. Ульяна 13 ийым темен, Лёня – кум ийым.
Тылеч посна Алевтина Кокласола тӱвыра пӧртын «Куан памаш» вокально-эстрадный студийым вуйлата.
Эстрадыште
Эльвира колледжыште тунеммыж годым палыме эстраде мурызыш савырнен. Роза Искакова, Александр Речкин дене пырля мурат. а ынде Юлия ӱдыржӧ денат кок мурым дуэт дене войзеныт. «Идалыкысе муро» концертыш «У ий дене» муро дене лектыныт ыле.
Тымарте Э.Токташеван 30 утла мурыжо уло. Марий калыкым сылне, келге тематикан да шонкалаш таратыше мурыла дене куандарашак тырша. М.Шкетан лӱмеш Марий драмтеатрын актёржо Владислав Виногоров (2021 ийыште ош тӱням коден кайыш) дене когыньыштын кок шочшышт кушкеш. Нунат артист кумылан улыт.
Эльвира республикысе калык усталык рӱдерыште кадр пӧлкам вуйлата. Максим эргыже тений 10-шо классыш вончен. Тудо кызыт компьютерлан да техникылан шӱмаҥын. 4-ше класс марте «Онар» ансамбльыште куштен. Юлия шӱжарже тушко эше вич ияш улмыж годымак кошташ тӱҥалын да «Онар» ансамбль дене пырля сценыш лектын. Кызыт Юлиян (мурызо семын псевдонимже – Юлия Ви) «Кеҥеж» сольный мурыжо уло. Лишыл жапыште тудын кова нерген мурыжо лектеш.
Усталык шӱлышан ешыште икшыве-влакат тыгай корно дене каят, шке сеҥымашышт дене куандарат. Меат нунын верч куанена да марий сымыктышынам пойдарыше-влаклан тауштена. Вет статьяште возалтше кажне еҥ Марий кундемлан кугу надырым пыштен да пышта.
Эльвира Терентьева.
Еш альбом гыч налме фото.