Марий Эл Правительстве Председательын икымше алмаштышыже Дмитрий Троицкий Марий Элысе ресторатор-влак дене Йошкар-Олаште гастрономий кластерым ыштыме да туризмыште гастрономийым вияҥдыме теме-влакым каҥашен.
Туризм сферыште кочкыш моткоч кӱлешан. Марий калыкын кухньыжо Марий Элысе уна-шамычлан тӱвыра ойыртемым, йӱлам да верысе илышым утыр пален налаш полша. Кызыт республикыштына кочкышым темлыше 1 148 организаций уло. Но лач 20 процентше гына турист ден экскурсий тӱшка-влакым пукшаш ямде.
Дмитрий Троицкий ты отрасльыште услугым ешараш да сай качестван кочкышым темлаш палемден. Тыгак гастрономий кластерым ыштыме, Марий Элысе Экономикым вияҥдыме министерстве могырым полшымо да Торгово-технологический колледжын полшымыж дене линейный персонал-влакын компетенцийыштым ешарыме нерген мутланыме.