Республикысе профсоюз ушемын «Люди труда» фестиваль-конкурсышто (апрель мучашыште лийын) Шернур район Койсола гыч Ансимовмыт еш поснак ойыртемалтын. Кум тукымышто ятыр туныктышо тыршен. Чылаже туныктымо стаж 177 ийыш погына.
Койсола школышто математикым, физикым, информатикым туныктышо Ольга Михайловна Анисимова пелашыжын тукымвожшым аралаш толын. Тукымышто улшо туныктышо-влак нерген жюрилан келге материалым аклаш пуэн.
Ольга Михайловнан паша корныжо Лажъял школышто тӱҥалын. Тушто тудо математике ден информатикым ятыр ий туныктен. Варажым директорын воспиталыме паша шотышто, туныктымо паша шотышто алмаштышыжлан ыштен. 2020 ийыште Койсола школыш куснен.
– Андрей пелашемын кочаже Андрей Петрович историйым, коваже Мария Иосифовна тӱҥалтыш класслам туныктеныт. Нунын кокымшо эргышт Николай Андреевич ден тудын пелашыже Галина Александровна физике ден математикым туныктеныт. Нунын Андрей ден Сергей эргышт туныктышо профессийым ойырен налыныт. Андрей пелашем институтышто физмат пӧлкам тунем пытарен, но школышто туныктен огыл. Сергей Николаевич – ПГТУ-што чоҥымо технологий да машина корно кафедрын доцентше. Мый, нунын шешкышт, школышто 19 ий пашам ыштем. Андрей пелашем дене институтышто тунемме годым палыме лийынна, варажым ушненна. Кум шочшына уло, – мане О.Анисимова.
Койсола тӱҥ школыш 62 йоча коштеш, 11 туныктышо пашам ышта. Ольга Михайловна шке пашажым моткоч йӧрата, тукымжым пагала да нунын пашаштым умбакыже шуя. Паша лектышыже уло. Тудо кӱшыл категориян туныктышо, тыгак самырык туныктышо семын «Ялысе школышто информаткым эн сай туныктышо» Марий Эл Республикын Президентшын грантшым ондак сеҥен налын.
Икмыняр выпускникше физике ден математике направленийла дене илыш корныжым кылден.
Тыгай конкурсыш Ольга Михайловна икымше гана ушнен да сеҥышыш лектын. Анисимовмыт тукымышто ты йӱлам умбакыжат шуяш тӱҥалыт манын ӱшаныме шуэш.