Тумо ожнысек шнуй пушеҥгылан шотлалтеш. А тумлегыжым кугезе кочана-кована-влак ятыр черым эмлаш кучылтыныт.
Эмым ямдылаш йогышо тумлегым погыман. Тудым кукшо, юж пурыман верыште але духовкышто (йошкаргырак тӱсым налмешке) коштыман. А кӱчымӧ тумлегыште кверцетин манме вещества уло, тудо янлыклан пайдале, но айдемын тазалыкшылан эҥгекым конден кертеш. Аярже термообработко да вӱдыштӧ кучымо годым гына пыта, садлан кӱчымӧ тумлегым кочман огыл.
Кофем ямдылаш лиеш
Тумлеге кофе пеш пайдале. Ложашым ямдылаш манын, тумлегым противеньыш вичкыжын шарен пыштыман да ырыктыме духовкышто вич минут коштыман, шӱмжӧ шелшаш. Вара духовко омсам почман да саскам эше ик шагат коштыман. Йӱкшышӧ тумлегым, шӱмжым эрыктымеке, кофемолкеш тыгыдемдыман. Кофем ышташ ик стакан вӱдлан ик изи совла порошокым кучылтман.
Кофе ятыр черым сеҥаш полша. Арняш ик чашкым йӱмӧ шӱм-вӱргорно чер деч арала. Тыгак астме, бронхит, кужун кокырымо, золотухо, йоча рахит, пагар корштымо годым пайдале. Кочкышым шулыктарыше орган-влак черле годым кофем кок кугу совла дене кечеш кум гана кок арня йӱман. Хронический гипертоний годым туддене тыглай кофем алмашташ темлалтеш. А ты кофеш шӧрым ешараш гын, кокыртышым эмлыше сай эм лиеш.
Диабет ваштареш
Тумлеге вӱрыштӧ сакырым нормыш конда, садлан диабет черан-влаклан тудо поснак пайдале. Порошокым ик изи совла дене кечеш кок гана кочмо деч ик шагат ончыч кочман.
Коштымо тумлегым шӱмжӧ деч эрыктыман да мясорубко гоч колтыман. Ик стакан эрыктыме тумлеге ӱмбак 1,5 литр вӱдым темыман да изи тул ӱмбалне пел шагат шолтыман, вара 24 шагат шинчыктыман. Вара эше пел шагат шолтыман да суткалан кодыман. Эше ик гана тыге ыштыман. Лемым шӱрыман, тушко ик стакан ош аракам темыман. Настойкым, кум гана подылын, кечеш шым гана кок арня йӱман. Тудым холодильникыште аралыман.
Пагар-шоло корно чер витара? Тудымат тумлеге эмла. Тыгак пайдале шӱрым шолташ лиеш.
Тидын нерген 16 сентябрьыште лекше «Тазалык-эсенлык» лаштыкыште лудса. Кевыт