Марий аварийно-утарыше службышто кажне ийын эн сай утарышым ойырат. Тыгай пашаеҥ профилактике пашаште шкенжым чолган ончыктышаш, лӱдыкшыдымылык месячниклаш ушнышаш, тӱрлӧ таҥасымаште шкенжым тергышаш, кычалме-утарыме да аварийно-утарыше пашалаште тале лийшаш да шке службышто чын илыш позицийым ончыктышаш. Тудо пашаште шкенжым эре шуарышаш, улан тунемшаш, у кӱкшытыш шуаш тыршышаш. Идалык мучко шуктымо пашам иктешлен, балл-влакым ушен, тений Марий аварийно-утарыше службын эн сай утарышыжлан Рӱдӧ аварийно-утарыше отрядын икымше классан утарышыже Дмитрий Никитиным шотленыт.
Мебельщик лийнеже улмаш
Дмитрий – Шернур район Мушкыдӱҥ ялын эргыже. Лажъял школым тунем пытарымеке, Йошкар-Оласе технологический колледжыш мебельщиклан тунемаш пурен. Но профессийже дене кужу жап пашам ыштен шуктен огыл, армийыш каен. Порысшым шуктымеке, мебельщикланак ышташ шонен, но келшыше паша верым муын огыл. Палымыже-влак тудлан Марий аварийно-утарыше службыш еҥым кычалыт манын ойленыт. Дмитрий – В, С категориян водитель, садлан тудым вигак пашаш налыныт. 2012 ий февраль годсек Д.Никитин ты службышто тырша.
Чодыраштат, корныштат, вӱдыштат…
– Самырык-влак чӱчкыдын паша верым вашталтат. Мыйын тыгай шонымашем ик ганат лийын огыл. Тыште коллектив сай, пашам келша. Службыш толмем почеш петыралтше омса-влакым почаш чӱчкыдын колтеныт. Йомшо айдемым кычалаш ятыр гана лектынна. Ик случай поснак шарналт кодын. Козьмодемьянск тракт деч тораште огыл чодыраште ик коча йомын ыле. Поҥгым погаш каен да мӧҥгыжӧ пӧртылаш корным муын огыл. Тудым ик смене кечыгут кычалын, муын огыл. Вес кечынже мемнан сменына тудым муын. Коча йӱдвошт чодыра мучко янлык-влак деч лӱдын коштын.
Корно туткар-влак пеш шуко лийыт. Южгунамже вызов почеш кудал миена да моткоч шучко сӱретым ужына. Тыгайжым шарнаш огына тырше, но южыжо ушышто садак кодеш. Икана Оршанке трактыште вич шагат эрдене кок машина вашла керылтын. Тунам тӱтыран ыле. Кок машинаштыжат икмыняр еҥ дене колен. Иктыштыже йоча вургем пеш шуко лийын, садлан ме, машинаште икшыве лийын манын шонен, йочам кычалаш тӱҥалынна. Ончыч транспортышто онченна, чыла вургемым луктеденна. Вара – корно воктене, шудо коклаште. Йоча уке. Икмыняр жап гыч веле пален налынна: тудо машина дене икшывым налаш каеныт улмаш. Утарыше-влаклан ушышто оккӱл шарнымаш деч утлаш, пашаште нойымым пытараш психолог-шамыч полшат. Нуно тӱрлӧ занятийым, беседым эртарат, – каласкала Д.Никитин.
Нылымше разрядан водолаз
Аварийно-утарыше службышто ик ий пашам ыштымекыже, Дмитрийлан Москош водолазлан тунемаш каяш темленыт, пӧръеҥ – ынде нылымше разрядан водолаз. Дмитрийлан тиде паша келша, службышто коллегыже-влакат тудым моктат. Тений сентябрьыште Д.Никитин Санкт-Петербургышто командировкышто лийын, водолаз-влаклан лӱмын келыштарыме программе почеш паша опытым поген.
– Вӱд йымак чӱчкыдын пураш перна. Тений Йошкар-Оласе Патриарший площадь воктене Изи Какшан эҥерыш йӱдым рвезе пуреҥгаен. Рвезым катамаран дене коштшо-влак шекланеныт. Нунын ойлымышт почеш, рвезе ончыч вӱдыштӧ койын, а вара кенеташте йомын. Тудын капшым мыйын сменем годым кычалаш миенна, луктынна.
Келге вӱдыштӧ пуреҥгайышын капшым кычалме годым эхолот дене пайдаланена. Тиде арвер вӱд йымалысе объект-влак ӱжакам кычал муаш полша. Иктаж-мом шекланена гын, верым навигаторышто палемдена да ты точкым вӱд пундаште кычалына. Изи вӱдыштӧ нине арвер-влак полшен огыт керт. Тунам ужшо -влакын ойлымыштлан эҥертен, пуреҥгайыше айдемын капшым кычалаш перна.
Водолаз семын икымше гана Советский район Роҥго села воктеке миенам. Вӱд румбыкан, пундаш лавыран ыле, нимат ок кой. Туге гынат шке пашам кӱлеш семын шуктенам, – манеш утарыше.
Сай пашалан – медаль
2017 ийыште Д.Никитиным Россий МЧС-ын «За спасение погибающих на водах» медальже дене палемденыт. 2016 ийыште шыжым тудо эше ик айдемын илышыжым утарен коден. Тунам Йошкар-Оласе Рӱдӧ кӱвар воктене ик пӧръеҥ эҥер гоч вончен. Ий вичкыж лийын, да тудо пуреҥгаяш тӱҥалын. Тиде жапыште студент-влак эртен каеныт улмаш. Утарыше-влакын толмешкышт, нуно пуреҥгаяш тӱҥалше пӧръеҥым, кужу варам шуялтен, вӱд ӱмбалне кученыт.
Дмитрийын оҥыш-тыжо эше ик медаль чолгыжеш – Россий МЧС-лан 25 ий темме лӱмеш. Тудымат пашаште сай лектышлан пуат. Ӱмаште чодыра пожарым йӧрташ полшымыж нерген Дмитрийын оҥыштыжо кечыше Отличий знак гыч палаш лиеш.
– Эн сай утарыше лияш лӱмын ямдылалтында мо? – йодым Д.Никитин деч.
– Мый шке пашам гына шуктем. Физический подготовкым эре «отличнолан» сдатлаш тыршем, таҥасымашлаште шкем тергем, тӱрлӧ мероприятийыш ушнем, – мане тудо.
Дмитрий – кум шочшан ача, ӱшанле пелаш. Тудо колледжыште налме профессийжымат ӧрдыжеш коден огыл. Яра жапше годым тӱрлӧ арверым ышта: окна рамым, омсам. Мӧҥгыжӧ иктаж мебель кӱлеш гын, размерым шке виса да мебель цехышке заказым пуа, вара шке пога.
Службыштыжо Дмитрий шкенжым эн сайлан, ойыртемалтшылан ок шотло. Кажне сменыж годым тудо пашашкыже толеш да мом ыштышашыжым кӱлеш семын шукта. Тыгай годым сеҥымаш шкенжым кужун ок вучыкто.
Дмитрийым да коллегыже-влакым шушаш профессионал пайремышт дене саламлена!
Д.Никитинын альбомжо гыч налме фото.