Июньышто «Отечествым аралыше-влак» фондын Марий Элысе филиалжын командыже Волжский район Приволжский посёлкын эргыже, СВО-н ветеранже Дмитрий Спиридоновлан тупым да тошкалтышым (подножка) электрорегулировкан ступенькоход коляскым пуэн. Самырык пӧръеҥ СВО-што нелын сусырген, пел йолжо деч посна кодын. Но нелылык ончылно вуйжым ок саке. Илышым эшеат чот йӧраташ тунемын, спорт дене кылым куча, следж-хоккей дене Марий Элын сборныйыштыжо модеш.
Волжск оласе целлюлоз-кагаз комбинатыште пашам ыштымыж годым 2022 ий октябрьыште Дмитрийлан специальный военный операцийыш каяш повестке толын. Марий рвезын тунам чоныштыжо могай шижмаш лийын, иктат ок пале. А кӧн шочмо ялым, ешым, родо-тукымым коден кайымыже шуэш?! Тургыжланымаш, вургыжмаш, очыни, лийыныт. Но Дима чын пӧръеҥ да патриот семын элым, калыкнам аралаш каен. Рядовой Дмитрий Спиридонов Луганскыште, варажым Донецкыште служитлен.
– Ончыч стрелок лийынам, варажым – пулемётчикын полышкалышыже, – ойла ветеран. – Кажне кечын тул коклаште улмеке, шукылан тунемат. Военный пашаште сеҥымашке шуаш, илыше кодаш манын, саргуралым жапыштыже кучылтман, тактике кугу рольым модеш. Тылеч посна шкем кучен, командыште пашам ыштен моштыман, стресс ситуацийлаште решенийым приниматлен кертман, икымше полышым пуаш ямде лийман. Пырля служитлыше йолташем-влак дене тул-вӱд вошт эртыме, пырля йӱштӧ-шокшым чытыме, вашла эре полшымо.
СВО кайыме верыште кажне кечын гаяк пудештарыме, лӱйкалыме йӱк йоҥга. 2023 ий 15 майыште Донецк областьысе Бахмут районышто мемнан салтак-влак миномёт обстрелыш логалыныт. Тушто Дмитрий нелын сусырген. Но суксыжо арален коден, колымаш деч утарен. Марий рвезе пурла йолжо деч посна кодын. Кызыт мӧҥгыштыжӧ тазалыкым тӧрлата. Вашке пашашкыже лекташ шона. Д.Спиридонов манеш:
– Колымаш да утлымаш коклаште лиймеке, илыш умылымаш вашталтеш. Ала-молан шукынжо илышым огына акле. Шкеннам тӱрлыж дене аҥыртарена, тазалыкнам огына переге. А нелылык дене тӱкнымек умылена: илыме шуэш! Пиалан, эрыкан лийме шуэш! Кызыт чылажымат вес семын ончем. Ончыкылык нерген шукырак шонем. Тазалык шотышто нелылык уло гынат, тиде илаш, шкем чолган ончыкташ чаракым ыштышаш огыл. Мый следж-хоккей, ӱстембал модыш-влак дене модам. Шошым Москош Кибатлетике реабилитаций занятийлаште лийынам. Тушто мыйын гаяк еҥ-влакым протезым чын кучылташ туныктеныт.
Дима – кӧргывиян айдеме, кызытсе тукымлан сай пример, ача-аван эҥертышыже.
Еш альбом гыч налме фото.