Тул деч аралалтса
МЧС-ын тÿҥ управленийжын надзор ден профилактике паша шотышто управленийын кÿштымыж почеш 27 апрель гыч 12 май марте Марий Элыште поснак тÿткö противопожарный режим нерген увертарыме. Ты пагытыште чодыраш кошташ чарыме. Тыгак кошкышо шудым йÿлалташ, тулотым ылыжташ, чара тулышто кочкышым ямдылаш, населённый пунктлаште пиротехникым кучылташ ок лий.
МЧС-ын тÿҥ управленийжын надзор ден профилактике паша шотышто управленийым вуйлатышын алмаштышыже Сергей Порфирьевич ПЕТРОВ:
– 2020 ий 27 апрельлан Марий Элыште 411 пожарым регистрироватлыме. Эртыше ий дене таҥастараш гын, тидыже 30,5%-лан шагалрак (591 пожар лийын). «Йошкар агытанлан» кöра тений 9 еҥ колен (ÿмаште – 14 еҥ), 9 еҥ сусырген (ÿмаште – 7 еҥ).
Пожар-влак тÿҥ шотышто ончычсо семынак илемлаште, сурт-оралтылаште лиедат. Бытовой пожарын тÿҥалме амалже эре иктак: еҥ-влак тулым эскерыде кодат, электрооборудованийым чын огыт кучылт, пожар деч аралалтме правил-влакым шотыш огыт нал. Тыгак коҥгаш олтымо годым тÿткыш укелан кöра тул талышнен кертеш.
Статистике почеш 90% наре пожар-влак шошым да кеҥежым лиедат. Ты пагытыште еҥ-влак илемла воктене кукшо шудым, шÿкым йÿлалтат. Тамакым, тулжым йöртыде, кукшо шудеш кудалтат але йоча-влак тул дене модыт… Чыла тидыже моткоч шучко лийын кертеш.
Тений ий тÿҥалтыш гыч 199 пожар шудым да шÿкым йÿлалтымылан кöра лийын. Эн шуко пожар Йошкар-Ола воктене (32), Курыкмарий (29), Волжский (26), Звенигово (27), Медведево (21) районлаште лийын.
Ӱмашсе дене таҥастарымаште 27 апрельлан кукшо шудо ден шÿкым йÿлалтымылан кöра лийше пожарын чотшо 41%-лан шагалемын: ÿмаште – 338, тений – 199. Кукшо игече шогымылан кöра ÿмаште апрель-май тылзылаште 777 пожар лийын (идалык мучко лийше пожар гыч – 44 процентше), тышеч 632 – шÿк ден кукшо шудо йÿлымылан кöра. Чылажат еҥ-влакын тул дене эскерыде пайдаланымыштлан верчын.
Пожар ынже озалане манын:
- кукшо шудым ида йÿлалте;
- йÿлышö шырпым да тамакым мландыш ида кудалте;
- кукшо да мардежан игечыште тулотым ида ылыжте. Ылыжтеда гын, эскерыза да йöртыде ида кодо;
- торым да тÿрлö атым илыме верла деч 50 метр лишне ида йÿлалтыл;
- йоча-влаклан тулым луктын кертше арвер-влак дене модаш ида пу;
- илыме верда йыр кукшо шудым эрыктен налза.
Тул йÿлымым ужында гын, эртен ида кай. 112 номер дене йыҥгыртыза, увертарыза. Шикш пушым шижмеке, тудын кушеч лекмыжым, мо йÿлымым пален налаш тыршыза. Воктене вÿд уло гын, тулым чарыза. Тыгак рокым шавен йöрташ лиеш. Йÿлаш тÿҥалше шудым, кертыда гын, чарыза. Тидым 1,5-2 метр кутышан лышташан але иле пушеҥге укш дене ышташ лиеш. Йÿлышö верым ниялтыме семын ик вел гыч вес велыш удыралман. Тулым нöртымö вургем але куэм (ткань) денат йöрташ лиеш. Тул кугу огыл гын, йол дене тошкалын чарыза.
Поснак тÿткö лийме режим жапыште пожар лÿдыкшыдымылык правил-влакым шуктыдымылан граждан-влаклан 2-4 тÿжем, должностной лицалан 15- 30 тÿжем, индивидуальный предприниматель-влаклан 30-40 тÿжем, юридический лица-влаклан 200-400 тÿжем штрафым тÿлыктат.