16-18 ноябрьыште Москошто «Транспорты России» XV тӱнямбал форум эртаралтын.
Тушто Марий Элым вуйлатыше А.Евстифееват лийын. Икымше кечын тудо Транспорт сферысе надзор шотышто федеральный службым вуйлатыше В.Басаргин дене вашлийын. Нуно Йошкар-Олаште у автовокзалын пашаж нерген каҥашеныт. Ты объектым лач ик кече ончыч (15 ноябрьыште) генподрядчик сдатлен, а вокзал вес ийын январьыште пашам ышташ тӱҥалеш. Толшо-кайыше еҥ-влаклан тушто павильон, 10 перрон, ава ден ньоган пӧлемышт, медпункт, 40 автобуслан да 26 машиналан вер-влак улыт. Кызыт республикысе Минтрансын специалистше-влак ты объектым кадастровый учётыш шогалтыме пашам шуктат.
Тылеч посна А.Евстифеев ден В.Басаргин пассажир-влакым шупшыктымаште лӱдыкшыдымылыкым кораҥдыме да ты сомылым утларак йӧнаным ыштыме нерген каҥашеныт. Ространнадзорым вуйлатышын палемдымыж почеш, у автовокзал тидлан полшышаш. А Марий Элым вуйлатыше аэропортым уэмдыме, терминаллан проектирований ышталтме нерген каласкален. Тыгак корным ачалыме шотыштат мутым луктын. Марий Эл «БКД» нацпроектым шуктымо дене Российыште кудымшо верыште шога.