Кызыт рвезын служитлыме 3-шо батальонын 2-шо парадный ротыжо Москошто 9 Май пайрем кечылан чот ямдылалтеш.
Сценыште «Эреҥер» але «Эрвел марий» ансамбль-влак выступатлыме годым изирак капан ты мотор качымарийым ужында, шонем. Руслан Шуматов дене пырля ик ийын Пеледыш пайрем годым ӱдыр-влакын конкурсыштым аклышна. Жюриште самырык рвезым ужмек, кӧ тугай улат манын, палыме лийна.
Армийыште
Пошкырт кундем Мишкан район Памаш ялын эргыже Руслан Шуматов кызыт армийыште улмаш. Москошто 27-ше гвардейский мотострелковый бригадыште служитла.
«Мотострелковый манмыже лӱмыштыжӧ веле кодын, тудым танковыйыш савырынешт. А военный билет почеш мый радиотелефонист улам», – манеш салтак.
Туге гынат ик ротышто улшо срочник-шамыч тӱрлӧ верлаште тӱрлӧ пашам шуктат: иктышт пасушто учебкышто улыт, весышт – Моско областьысе Алабино оласе воинский частьын складлаштыже але Санкт-Петербург кундемыште командировкышто.
«Мемнан учебке лийын огыл. Присягым приниматлыме деч вара вигак Моско областьысе Алабиносо частьыш командировкыш колтышт. Тушто кум тылзе лийынна. Сентябрьыште Моско областьыште лийшаш сайлымаш вашеш мӧҥгеш пӧртылна. А варажым мыйым Новгород областьысе Валдай олашке колтышт. Тушто ик военный частьым петыреныт, ме тушто тӱрлӧ пашам шуктенна. Валдай оласе частьыште Марий кундем гыч 40 утла еҥ служитлен. Нуно Морко Советский, Параньга районла да Йошкар-Ола гыч мийыше-влак шукынжо марий лийыныт», – каласыш Руслан.
Йошкар площадьыште лиеш
Р.Шуматовлан эше ныл тылзе военный формым чийыман. «Ме кызыт кажне кечын Сеҥымаш парадыште строй дене ошкылаш ямдылалтына. Ме тушто формо дене кокымшо коробкышто (икымшыште пехото лиеш) ошкылаш тӱҥалына. Кызыт мый гвардейский частьын рядовойжо веле улам. Но значокым пуаш сӧреныт, сандене ефрейтор лийын толам дыр», – куан уверже-влак дене палдарыш тудо.
Кызыт рвезын служитлыме 3-шо батальонын 2-шо парадный ротыжо Москошто 9 Май пайрем кечылан чот ямдылалтеш. Кечывал деч ончыч ты ротысо салтак-влак маршироватлаш, шереҥгым чын кучаш тунемыт, а кечывал деч вара иктаж занятий лиеш але телевизор дене парадым ончат.
Муро аланыште
9-ше класс деч вара (Кӱрзе школышто тунемын) Руслан Мишканысе агропромышленный колледжыш тунемаш пура. «Ялозанлыкысе машинист-тракторист» специальностьым налаш шона. Кумшо курсым тунем пытарымек, кеҥежым Игорь пошкудыжо Йошкар-Ола гыч канаш толын улмаш. Вара туддене пырля Марий Элыш кудалын.
«Мый изиэм годсек мураш йӧратенам, – ойла тудо. – Школышто, ялысе клублаште, агропромышленный колледжын кажне гаяк мероприятийыштыже выступатленам. Вара Палантай лӱмеш тӱвыра да сымыктыш колледжыш тунемаш каяш шонен пыштышым. «ВКонтакте» соцсетьыште мурызо Аделина Батаевам кычал муым, вет ты жапыште тудын мурыжым колыштам ыле. Чыла адрес-влакым рашемдышым, да Йошкар-Олашке кудална».
Тыге пошкырт вел марий рвезе хоровой отделенийыш «Артист-вокалист (солист), преподаватель, клубный работник» специальность дене тунемаш пурен. Тунам «Машинист-тракторист» специальностьым налаш эше пел ий кодын улмаш. Сандене Руслан иканаште кок вере тунемеш да ялозанлык профессийым налеш. А ныл ий гыч тӱвыра сферыште пашам ышташ келшен толшо специальностян лиеш да армий деч ончыч ик ий наре «Эреҥер» ансамбльыште солист-вокалистлан пашам ышта. Тылеч посна Руслан Шуматов «Эрвел марий» ансамбльышке вич ий коштын. Нине коллектив-влак дене пырля тӱрлӧ верлашке миен толын.
Р.Шуматов але ӱдырым налаш эр манеш. Тудын армий гыч пӧртылмыжым шочмо Пошкырт кундемыштыже илыше родо-тукымжо-влак вучат. Ешыштышт куд икшыве кушкын. Кугурак изаже – кум шочшан ача, Кӱрзе ялыште ила. Акажынат тынарак шочшыжо уло. Татьяна шӱжарже поварлан тунемеш. Тудат Йошкар-Олаш каяш да хоровой отделенийыш тунемаш пураш шона. Шольыж ден шӱжарже-влак але школышто тунемыт. Ачашт «Башавтотранс» предприятийыште пашам ышта, авашт Уфа олашке смене дене пашам ышташ кудалыштеш.
Русланын чонжылан лирический муро-влак келшат. «Эрвел марий» ансамбльын 2017 ийысе концертыштыже мурымо Интернетыште тудын «Ида ойырло» муро уло. Тудо шкаланжат, еҥ-влаклан лишыл. Тыгодым гармоньым Борис Дмитриев ден Алексей Рябинин шоктеныт. Тылеч посна марий рвезе концертлаште «Пасунажат кодеш», «Эржат, касшат, кечывалжат…», «Кӱкшӧ курык вуйышто», «Муралтенат-муралтен», «Тендан урем» муро-влакым мура.
Армий гыч толмекше, Р.Шуматов ты кок ансамбльышкак пӧртылаш шона. Рвезе пала: тыште тудым сай да поро йолташыже-влак вучат да кӱлеш годым полшат.
Эльвира Терентьева.