Волейбол дене тӱнямбал чемпионатын пӧръеҥ команде-влак коклаште модмашын официальный талисманже Тигроша лиеш.
Чемпионат 2022 ийыште 26 август гыч 11 сентябрь марте Российысе лу олаште: Москошто, Санкт-Петербургышто, Калининградыште, Ярославльыште, Озаҥыште, Ӱпыштӧ, Екатеринбургышто, Новосибирскыште, Кемеровышто да Красноярскыште – эртаралтеш. Тиде чемпионат Тӱнямбал волейбол федерацийын историйыштыже 20-шо гана лиеш.
Ӱмаште Интернетыште болельщик-влак коклаште талисманым ойырен налме шотышто йӱклымаш эртаралтын. Йомак герой, янлык, арвер да игече явлений кокла гыч финалыш Маска, Робот да Тигр лектыныт. Кугу ӱчашымаш Тигр ден Маска коклаште каен. Амур тигр эн шуко – 45,9% йӱкым – поген.